Bya Ssemakula John
Nsambya
Katikkiro wa Buganda, Charles Peter Mayiga alambudde ku Kalidinaali Emmanuel Wamala era n’abaako n’obubaka bwa Ssaabasajja Kabaka bw’atuusa olw’okufiirwa muto we, Msgr. Henry Kyabukasa.
Ensisinkano eno ebaddewo leero ku Mmande mu maka ga Kalidinaali e Nsambya mu Kampala.
“Ssebo Omutiibwa Kalidinaali, nsanyuse nnyo okujjako wano mu maka go era Ssaabasajja Kabaka atumye nnyo okukulaba era akusaasidde olw’okufiirwa muto wo Msgr. Henry Kyabukasa era n’antuma okutegeeza nti asiima nnyo essaala z’omuweereza era akakasiza ddala nti zimuyambye.” Katikkiro Mayiga bw’ategeezezza
Ku lulwe Katikkiro Mayiga ategeezezza nti muto wa Kalidinaali Byabukasa yali amumanyi okuva mu buto kuba yakola ne kitaawe Fr. John Musoke nga batendeka abaseminariyo e Bukalasa ate ng’abamu ku abo batendese abadde nabo emyaka mingi.
Katikkiro Mayiga agamba nti Msgr. Kyabukasa yali mwetowaze olw’okuba yali mugezi era ng’akimanyi nti muto wa Kalidinaali.
Okusinziira ku Katikkiro Mayiga, kyamukisa okuba nti Katonda abawadde ekirabo eky’okulaba Kalidinaali ebbanga lino lyonna naddala abo abamulabako ng’akyali Ffaaza era kibeera kyasanyu buli lwe bamusisinkana.
Mu ngeri y’Obuwangwa, Katikkiro Mayiga mu kukubagiza kuno agenze n’ekita ky’omwenge okwongera okulaga okunyolwa.
Ye Omutiibwa Kalidinaali Emmanuel Wamala asiimye Katikkiro Mayiga olw’okumulambula era n’amusiima olw’emirimu gy’akola okusitula embeera z’abantu mu Buganda.
“Onsanyudde kubanga obugenyi bwo buno buziguliddewo ebijjukizo ebyo. Ssebo Kamalabyonna wa Buganda n’obuwombeefu bungi nkusaba onamusize Bbaffe Ssaabasajja Kabaka ne maama Nnaabagereka, abaana beng’oma, Abalangira n’Abambejja n’Obuganda bwonna.” Ssaabasumba omuwummuze ow’essaza ekkulu ery’e Kampala bw’ategeezezezza.