Bya Ronald Mukasa
Wakiso – Busiro
Kamalabyonna Charles Peter Mayiga akuutidde abazadde okwerekereza buli ekisoboka baweerere abaana babwe kibayambe okufuna ebiseera byabwe ebyomu maaso ebirungi.
Entanda eno Katikkiro Mayiga agiweeredde ku ssomero lya Lubiri High School e Buloba mu Busiro bw’abadde alambula okulaba engeri emirimu gyegitambuzibwamu ku ssomero lino ku Lwokuna.
Owek. Mayiga akubirizza abatwala essomero lino n’abasomesa okumanyisa abayizi baabwe ebinaabayamba okufuuka ab’omugaso wano muggwanga, era naabeebaza olw’okukola obulungi emirimu gyabwe.
Kamalabyonna era alambuludde ku mugaso gw’omusomesa munsi yonna bwategeezezza nti omusomesa yateekateeka omuntu yenna okufuuka kyali. Mukuuma ddamula wano wasinzidde nakubiriza abasomesa bulijjo okubeera a bagunjufu nga bakola egyabwe basobole okugunjula abaana b’eggwanga.
Ono abasomesa era abasabye okubeera abayambi eri abayizi, okubazaamu amaanyi, okubagunjula era n’okubawabula olwo eggwanga bwerinaganyulwa mu bayizi bano.
Minisita w’Ebyengiriza n’Enkulaakulana y’Abantu, Owek. Chotilda Nakate kikomeko, yeebazizza abakulembeze b’essomero lino n’abasomesa olw’okutambuza obulungi emirimu gyebakola era neyeebaza kamalabyonna olw’okulambula amasomero g’Obwakabaka okusobola okulondoola engeri gyebakolamu emirimu.
Ye Minisita w’Amawulire n’Okukunga abantu, Owek. Israel kazibwe Kitooke, akunze abasomesa n’abakulembeze ku ssomero lino okubeera obumu okusobola okutuuka ku biruubirirwa byabwe era nabasaba okusomesa abaana b’eggwanga nokwagala kisobozesse abayizi okubeera abalambulukufu gyebali.