Bya Ssemakula John
Kawaala
Katikkiro Charles Peter Mayiga, ayogedde ku Paasita Augustine Yiga eyakazibwako erya Abizaayo ng’omusajja abadde omukozi ennyo era omumalirivu mu byabadde akola.
Okwogera bino Owek. Mayiga, abadde agumya abagoberezi b’ ekkanisa ya Christian Revival Centre e Kawaala wamu n’abooluganda lwa Paasita Yiga leero ku Lwokuna, bwabadde agenzeyo okubakubagiza.
“Singa Paasita Yiga yali yenyooma oba singa yali yeekubagiza teyandisobodde kutuuka kwebyo byeyatuukako mu bulamu, bwogerageranya gyeva eyo e Mawogola. Mu ngeri eyo ebyo byeyasobola okukola tugambe ekkanisa eno mwetuli, essomero, ttivi bibeere essomo eri fenna nti bwomalirira osobola okutuuka ku birungi nkumo,” Katikkiro Mayiga bw’agambye
Mayiga agambye nti wadde okufa kutuuka ku buli muntu naye tekumanyirika era nga wadde abagoberezi be babadde bakimanyi nti mulwadde naye amawulire g’okufa kwe gabakubye wala.
Ono ajjukiza abakungubazi nga Omusumba Yiga bweyali omu ku bantu abavaayo okwanukula omulanga gw’ettofaali mu kaweefube w’okunoonya ssente ez’okuzimba buggwe ku masiro era nasiima abagoberezi b’ekkanisa eno olw’omutima omugabi gwebalaga.
Mayiga alabudde abasumba okukomya okwelumbagana kubanga ebigambo by’enzirikiriza buli omu abitaputa bubwe, abasabye bawangane ebitiibwa mwebyo byebakiririzaamu.
Kamalabyonna awerekeddwako Minisita w’amawulire Noah Kiyimba era nayanirizibwa Kaggo Agnes Nakibirige Ssempa n’abakulu b’ekkanisa.