Bya Gerald Mulindwa
Busiro
Katikkiro Charles Peter Mayiga, asabye abavubuka okuyiga enkolagana ennungi n’abantu kibayambe okubaako bye batuukako mu bulamu, kubanga bulijjo omuntu abaako omulala gwe yeetaaga.
Owek. Mayiga abakubirizza okubeera abakozi era abanyiikivu baleme kwesaasira. Bino Mukuumaddamula abyogeredde mu ng’alambula musajja wa Kabaka, Fred Mutebi Kasozi eyakazibwako erya Mmamba atawanyizibwa obulwadde bw’okusannyalala.
“Abavubuka kye basobola okuyigira ku Mmamba, bukozi n’ekyokubiri enkolagana n’abantu, obulamu bwe tubeeramu, tuteekwa okuba nga tulina enkolagana ennungi n’abantu,” Owek. Mayiga bw’akubirizza.
Abasabye bulijjo okuyisa abantu obulungi kubanga bano be bafunamu emikisa.
Mw. Fred Mutebi Kasozi amanyiddwa nga Mmamba ye mumyuka w’omuwanika w’olukiiko lwa Buganda Twezimbe abaatalaaga ne Katikkiro Obuganda nga banoonya ettoffaali, okuzimba bbugwe w’Amasiro, Masengere, wamu n’okutandika BBS Terefayina.
Mayiga abavubuka abasabye bamulabireko era baagale nnyo Obuganda era basobole okugitwala ku ntikko kubanga be balina amaanyi agasobola okugituusa gy’eraga.
Ono azzeemu n’akubiriza abantu okukomya okulowooza nti bwe babeera baweereza e Mmengo babeera bakola ku bwannakyewa kuba gino emirimu gye bakola gibeera gyabwe.
Ye Mmamba asanyukidde okulambulwa kuno era neyeebaza Buganda ne Kamalabyonna olw’okumuwuliza entakera nga bayitira ku ssimu wamu n’obuyambi obwenjawulo bwe bamuwadde.
“Mbugaanye essanyu ow’Eddamula bwankyaliddeko era obulwadde buwonye, nneesunga kudda kuweereza Mukama wange. Nsiima byonna Obuganda bye bunkoledde nga ndwadde,” Mutebi bw’ategeezezza Katikkiro Mayiga.