Bya Ssemakula John
Bulange – Mmengo
Katikkiro Charles Peter Mayiga aggaddewo enteekateeka ya Luwalo Lwaffe ey’omwaka 2024 wakati mukutendereza obujjumbize, obumalirivu n’obumu obweyolekedde mu bantu ba Beene bwebaleese ensimbi ezimenye likodi bukya enkola eno etandikibwawo nga zino zisoba mu kawumbi akamu n’ekitundu.
Omukolo oguggalawo guyindidde mu Bulange e Mmengo ku Lwokuna ng’era wano Kamalabyonna Mayiga atikudde Oluwalo okuva mu masaza ag’enjawulo.
Luno luvuddemu ensimbi obukadde 258,777,150 nga zireeteddwa eggombolola okuli Mutuba III Makindye, Mutuba II Nabweru eya Owek. Mariam Ndagire, V1 Katwe e Buddu, Mutuba 1V Kawuga mu Kyaggwe, Masekkati Kibuga, Ssaabagabo Lufuka, wamu n’amasaza okuva ebweru weggwanga okuva e Bungereza, Sweden namalala era nensimbi ezireeteddwa olwaleero zezikyasinze okuleetebwa ku lunaku olumu.
” Twebaza abantu ba Buganda ne mikwano gyaffe mwenna abawagidde emirimu gy’Obwakabaka omwaka guno n’ensimbi akawumbi kalamba n’ekitundu n’okusoba (1,598,915,222/=). Omwaka gubaddemu bingi ebigezezaako okutuwugula, naye tubeebaza olw’obutava ku mulamwa ne musigala nga mutambulira mu buufu bwa Kitaffe Ssaabasajja Kabaka,” Mukuumaddamula Mayiga bw’annyonnyodde.
Owek. Mayiga akuutidde abantu ba Kabaka okubeera obumu akaseera konna kibayambe okuwangula ebisomoozo byonna ebiboolekera.
Ono Abaami ba Kabaka abasabye okwongera okunnyikiza obuweereza bwabwe mu bantu ba Kabaka nga bekubamu ttooci wa webatatambudde bulungi nate omwaka ogujja bajje nga bajjulidde ddala.
Minisita w’Obwakabaka owa Gavumenti ez’Ebitundu, Owek. Joseph Kawuki yeebazizza abantu ba Kabaka bonna abajjumbidde enteekateeka eno naasaba omwaka ogujja okusingawo.
Bw’abadde ayogera kulw’ Abaami abakiise Embuga, Kaggo Hajji Ahmed Magandaazi Matovu aweze nti sibakussa mukono mu nteekateeka y’okuleeta oluwalo kubanga Obuganda busobola bulungi okuyitiramu okulaakulana.
Kitegeerekese nti Obwakabaka bulimu eggombolola 175 kyokka kuzino 171 zisobodde okujjumbira enteekateeka ya luwalo lwaffe nga omuluka gwa Masekkati kikuubo gwegusinze okusonda ensimbi ate nga omuntu ssekinnoomu asinze okusonda oluwalo ye Pastor Wilson Bugembe.
