Bya Ssemakula John
Bunyoro
Katikkiro Charles Peter Mayiga agenyiwaddeko e Bunyoro ewali omulimu gw’okusima amafuta naasaba bannayuganda okuguwagira kisobozese okugafunamu nga gakyali ga bbeeyi okusobola okugafunamu.
Bino Mukuumaddamula Mayiga abitegeezezza bannamawulire ku Mmande ku kitebe ky’Obukama bwa Bunyoro naalabula abogerera enteekateeka eno amafuukuule.
“Tuzze okuwagira enteekateeka z’okusima amafuta kuba twagala okwelabirako n’amaaso gaffe. Amafuta bwekiba kya bugagga tukyeyambise nga kikyali kya bbeeyi. Abo aboogera nti tetusana kusima mafuta oba okuzimba omudumu bafaananako Omuganda kyagamba nti anaakuma enswa nti tolya omulalu,” Owek. Mayiga bw’annyonnyodde.
Katikkiro Mayiga asinzidde wano nasaba Bunyoro eweebwe omugabo ku mafuta. Ono akikkatirizza nti Buganda ne Bunyoro basaana egabane ku mugabo gw’amafuta basobole okweyimirizzaawo n’okuganyulwa abantu b’ekitundu kino kuba tesobola kubeera nga nte ekamwa awatali kuweebwa mata.
Okusinziira ku Katikkiro Mayiga ssente eziva mu mafuta zisobola bulungi obweyambisibwa okukuuma obutonde bw’ensi, okukola ku by’obulamu, ebyenjigiriza, eby’obulimi, amakolero n’ebirala.
Ono asuubizza nti Obwakabaka bwa Buganda n’ Obukama bwa Bunyoro bujja kutondawo akakiiko akasobola okukwanaganya obukulembeze bwombi era basobole okukola ku nsonga eziruma abantu omuli obwavu, eby’obulimi, eby’enjigiriza n’ebirala.
Ye Omuhikirwa wa Bunyoro, Andrew Byakutaaga yebazizza Katikkiro olw’obukulembeze obulungi nagamba nti alaze nti obukulembeze obw’ensikirano busobolera ddala bulungi okuteeka ettofaali ku ggwanga n’okukyuusa embeera z’abantu.
Byakutaaga ayanirizza ekirowoozo ky’okuteekawo enkolagana ey’omuggundu era nasuubiza okunyweeza enkolagana n’Obwakabaka.
Owekitingisa Byakutaaga asiimye emirimu gy’Obwakabaka egiyambye okukyusa obulamu bw’abantu naddala Emmwanyi Terimba nawera nti nabo bakugikwasa maanyi mu mwaka gw’ebyensimbi guno ogutandika.
Ono asuubizza nga Bunyoro bwegenda okwongera okutambulira awamu ne Buganda ku ensonga y’amafuta basobole okugafunamu era bakuume obutonde bw’ensi.
Kinajjukirwa nti Ow’omumbuga obugenyi buno abuliko okumala ennaku 3 nnamba okusobola okunnyonyoka ensonga ezikwata ku mafuta n’engeri gyebasobola okugasa bannansi.
Katikkiro n’ekibinja kye era balambudde ekisaawe ky’ennyonyi ekya Kabalega Airport, ekizimbibwa okusobozesa okuleeta ebyuma ebinaakozesebwa mu kusima amafuta era enkya ono asuubirwa okulambula enzizi z’amafuta e Buliisa, awamu n’enkulaakulana endala eri mu kitundu ekya Albertine.
Ku lugendo luno Katikkiro Mayiga yawerekeddwako; Omumyuka Ow’okubiri owa Katikkiro, Owek. Robert Waggwa Nsibirwa, minisita Noah Kiyimba, Ssaabawolereza Christopher Bwanika n’abakungu abalala.