Bya Stephen Kulubasi
Buddu
Katikkiro wa Buganda, Owek. Charles Peter Mayiga, akubirizza abantu okukuuma empisa ezikolebwa mu mikolo gy’obuwangwa mu butuufu bwazo, emikolo gisobole okusigala nga gya buvunaanyizibwa.
Obubaka buno Katikkiro abuweeredde Masaka ku mukolo gw’okwanjula kwa muwala we, Namukasa Viola era ng’ono abadde ayanjula omwami we Ssenkungu Livingstone.
“Okwanjula mukolo gwa buwangwa era gulina ennono kwe gutambulira. Naye era mukolo gwa ssanyu era tulina okusanyuka naye tulina okusanyuka mu ngeri esaanidde. Okwanjula mukukole mu ssanyu era nga kutambulira ku mulembe naye ennono y’omukolo ekuumibwe.” Bw’ategeezezza.
Mukuumaddamula era avumiridde ebikolwa ebikolebwa ku mikolo gy’okwanjula ennaku zino omuli abako okukyusiza engoye ku buko, okuzina amazina amangi ky’ayise okwesansabaga, okwanjala ebirabo mu luggya nga bwe babinnyonnyola kimu ku kimu n’ekikolwa ky’abako okumansa ssente mbu nga bakopperera obuwangwa bw’Abanigeria.
Katikkiro yasiimye nnyo bakalabalaba b’omukolo guno olw’okutambuza omukolo mu ngeri ennung’amu era n’asaba abantu okukuuma emirembe mu kalulu akabindabinda.
Namukasa Viola muwala wa mukulu wa Katikkiro, Omugenzi John Mary Mukasa Muzeeyi era omukolo gwetabiddwako abakulembeze ab’enjawulo omuli ne ssentebe wa disitulikiti y’e Masaka munnamateeka Jude Mbabaali.
Omukolo guno gwetabiddwako ebikonge eby’enjawulo okuli; baminisita, abakungu, bannaddiini wamu n’abantu abalala.