Katikkiro Charles Peter Mayiga asisinkanye abaweereza b’ebitongole by’obwakabaka abaasukkuluma ku bannaabwe omwaka oguwedde 2018.
Entanda gy’abasibiridde agitadde mu nsonga enkulu ssatu;
Balowooze ku kyokukola obulungi emirimu gyabwe okusinga okutunuulira omusaala omunene. Omukozi tayinza kusukkuluma ku banne nga ebirowoozo bye abitadde ku musaala munene kubanga teri kifo kitaliimu kusomooza. “obuwanguzi obwomulundi ogumu butankanibwa, omuntu yetaaga okuwangula engule emirundi egiwera olwo abantu bakakase nti asobola. Mulina okuddingana ebyabawanguza omwaka oguwedde, mukakase abantu nti musobola”. Njagala munywerere ku nkola ey’obwerufu, muve ku nkola ya “gadibe ngalye”, “Uganda bwetyo”, mwewale omululu.
Ensisinkano yetabiddwamu Minisita w’obuwangwa, embiri, n’obulambuzi Owek David Kyewalabye Male,ne Bassenkulu b’ebitongole by’obwakabaka.