Bya Ssemakula John
Buvuma
Katikkiro Charles Peter Mayiga akubirizza abakulembeze bulijjo okunonyanga abantu bebakulembera nga babalambula mu bitundu gyebabeera okusobola okumanya embeera mwebali.
Okwogera bino Owek. Mayiga abadde mu bizinga bye Buvuma gyeyagenze okukwasa Abaami ba Kabaka Amaato awamu ne Pikipiki ebyabaweereddwa Nnyinimu Ssaabasajja Kabaka okubasobozesa okulambula abantu ba Nnyinimu n’okumanya embeera mwebali.
Ow’omumbuga agambye nti abantu nebwebaba babeera mu bitundu ebyesudde, omukulembeze alina okubalambula okusobola okubatuusako obuweereza era n’okumanya obwetaavu bwabwe.
Katikkiro bano abasabye ebintu bino okubikozesa mu mbeera eweesa Kabaka ekitiibwa era bisobole okuganyula abantu be n’okutumbula embeera zabwe basobole okwekulaakulanya.
Owek. Mayiga ab’eBuvuma abasibiridde entanda ku bulwadde bwa Mukenenya naasaba abasajja okubeera abasaale mu kulwanyisa nawookera w’ekirwadde kino.
Mu bafunye entambula mwemuli abaami ba kabaka ab’eggombolola ya Mumyuka Bugaya ne Ssaabawaali Bwema nga bano bawereddwa amaato ga yingini 3,eggombolola ya Mbubi eryato 1 , eggombolola Musaale Ssejja Buvuma ne Ssaabagabo Nayiramba ppikippiki 2 n’omulimisa ppikippiki 1.
Minisita wa Beene omubeezi owa gavumenti ez’ebitundu Owek. Joseph Kawuki yebazizza abaweereza ba Ssabasajja olw’enkolagana ennugi naba gavumenti eya wakati era nakubiriza abantu emirimu naddala egyo egizza Buganda Ku ntikko.
Omukolo gwetabiddwako abakulembeze ab’ejawulo okuva mu gavumenti ya ssabasajja ne gavumenti eya waakati omubadde n’omubaka w’ekitundu kino, Robert Ndugwa Migadde.