Bya Ronald Mukasa
Butikkiro-Mmengo
Kamalabyonna Charles Peter Mayiga akunze abavubuka bulijjo okwenyigira mu nteekateeka ez’Ebika byabwe awamu n’emirimu gyaabyo basobole okubikulaakulanya.
Okwogera bino Katikkiro Mayiga abadde asisinkanye abavubuka ab’eddira Omutima Omuyanja, abazze okumwanjulira z’Ekika mu Butikkiro ku Lwokuna.
Olukiiko olukulembera abavubuka mu Kika ky’Omutima Omuyanja, lusisinkanye Katikkiro nerumwanjulira enteekateeka zaabwe ez’okwekulaakulanya.
Owek. Mayiga asabye abavubuka bulijjo okubeera abamalirivu basobole okukola ennyo okutumbula Ebika byabwe olwo Buganda esobole okukula.
Mukuumaddamula Mayiga era asabye abavubuka okutuulanga mu nkiiko z’Ekika ku mitendera gyonna era bulijjo beewale okwekubagiza bwebaba baagala okugenda mu maaso.
Ono era abakuutidde okubeera abayiiya, abeesimbu n’okukola emirimu emirimu gino egy’okwekulaakulanya n’obukugu basobole okusitula Ebika byabwe.
Ye Minisita w’Amawulire Okukunga era Omwogezi w’Obwakabaka, Owek. Israel Kazibwe Kitooke, asinzidde wano naakubiriza abavubuka bano okubeera abatetenkanya, okukyusa endaba y’ebintu kibasobozese okwekulaakulanya.
Bano era abakuutidde okukulembeza obwesigwa mu mirimu gyebakola.
Ssentebe w’abavubuka mu Kika ky’Omutima omuyanja,
Ssaalongo Kiwutta Robert Ssenkasi Kakeeto, nga yakulembeddemu olukiiko luno, agambye nti ezimu ku nsonga ezibaleese ewa Katikkiro mulimu okweyanjula gyali ng’Abavubuka, Okumusiima emyaka 10 nga akutte Ddamula, Okuyunga olutindo wakati w’abavubuka mu Bika bya Buganda ne Gavumenti ya Kabaka.