Musasi waffe
Katikkiro wa Buganda Oweek. Charles Peter Mayiga akkaatirizza omugaso gw’amawulire mu kutumbula enkulaakulana y’abantu.
Bwabadde asisinkanye Minisita mu gavumenti ya wakati akola ku nsonga z’amawulire ne tekinologiya, Judith Nabakooba mu Bulange e Mmengo, Mayiga ategeezezza nti eby’empuliziganya kyekimu ku by’obuggagga ebisinga.
“Byetukola byonna biyinza obutayamba singa abantu tebabimanya. Enteekateeka zetukola abantu basaana bazimanye kubanga bwebatategeera byetukola tebayinza kubyettanira. Awatali byampuliziganya tewasobola kubaawo nkulaakulana,” Mayiga bwagambye.
Kyokka agasseko nti newankubadde nga gavumenti erina aboogezi, ebiseera ebisinga obungi abawulira boogera ku by’abufuzi byokka.
“Enteekateeka eziyamba abavubuka lwaki tebazoogerako?” Mayiga bweyeebuuzizza.
Mayiga era akulisizza nnyo Nabakooba olw’okulondebwa ku bwa minisita n’agamba nti abakyala bassaayo nnyo omwoyo kubuvunanyizibwa obubakwasibwa okusinga abasajja.
“Abakyala tebatera kulemwa buvunanyizibwa bubakwasiddwa. Awo nno omukyala okuba nga yeyalondebwa mu kifo kino, tulowooza kyamukisa munene eri abaana abawala kubanga bw’oba on’okuza eggwanga ogunjula mukyala. Tukuyozaayoza era tukusabira,” Mayiga bwagambye.
Kululwe, Nabakooba asabye Obwakabaka okukwasizaako ku gavumenti ng’abatuusa amawulire agakwata ku nkulaakulana eri abantu okuyita ku mikutu gyabo egya leediyo ne ttivi.
“Emikutu gyaffe gyetulina gituyamba nga gavumenti naddala singa tuba tulina amawulire agakwata ku bannayuganda mu bintu eby’enjawulo. Tusaba bwetuba tubatuukiridde nga gavumenti mutuweeyo obudde okusomesa abantu baffe,” Nabakooba bwagambye.
Ayongeddeko nti bakimanyi nti eddoboozi ly’Obwakabaka liwulirizibwa bangi n’olwekyo nga kyetaagisa okubeeyambisa okutuuka eri abantu.
“Wano tulinawo leediyo bbiri wamu ne ttivi ate nga ziwulirizibwa naddala wano mu Buganda tusobola okuzikozesa okusomesa abavubuka eby’okwekulaakulanya,” Nabakooba ,ng’ono abadde awerekeddwako abakungu okuva mu ministule ye bwagambye.