Bya Ssemakula Francis
Butambala
Omwami wa Kabaka atwala essaza Butambala, Katambala Hajji Sulaiman Magala asabye abaami b’amagombolola abali mu ssaza lino okukola emirimu gya Kabaka nga tebeebalirira bayambeko mu nteekateeka z’okuzza Buganda ku ntikko era balwanirire Nnamulondo.
“Abaami be twafunye tubalabamu omuzinzi ogukyusa Butambala. Nsuubira nti omusomo gujja kubayamba nnyo okumanya kye bateekeddwa okukola n’ebyo bye batalina kukola ng’abaami ba Kabaka. Era nja kubalambika mu ebyo bye twetaaga okukola okuyitimusa Butambala.” Katambala Magala bw’agambye.
Katamba okwogera bino, abadde mu nsinsikano n’abaami ba Kabaka abaakalondebwa ku ggombolola ettaano ezikola essaza Butambala.
Kinajjukirwa nti ssabiiti ewedde, Ssaabasajja yasiima n’akola enkyukakyuka mu baami abatwala eggombolola mu masaza ag’enjawulo ng’emu ku nteekateka ey’okwongera obuweereza obulungi eri abantu be.
Katambala asinzidde wano n’asaba abaami ba Kabaka bano abaakalondebwa okutwala obuvunaanyizibwa obwabaweereddwa nga tebeebalira, basobole okulaba nga bayambako mu nteekateeka y’okuzza Buganda ku ntikko.
Ono ategeezezza nga bwe bagenda okusooka okusomesa abaami bano okumanya obulungi ebyo bye balina okukola wakati mu buweereza bwabwe .
Ssentebe w’abaami bano, Imam Kasim Kigozi yeeyanzizza Beene olw’okusiima n’abawa omukisa okuweereza mu gavumenti ye, n’agamba nti baakwetaba mu nteekateeka zonna ez’Obwakabaka.