Bya Samuel Stuart Jjingo ne Francis Ndugwa
Bulange – Mmengo
Nnyinimu Ssaabasajja Kabaka Ronald Muwenda Mutebi II alagidde abantu be wonna mu Buganda okujjumbira enteekateeka z’obulamu ezibaleeteddwa basobole okulaakulana kubanga omuntu omulamu yasobola okukola obulungi.
Omutanda, obubaka buno abutisse Omumbejja Sarah Kagere naabusomera abantu be mu Bulange e Mmengo ku Lwokusatu ku mukolo ekitongole ki Kabaka Foundation kwe kitongolezza enteekateeka ya ‘Tubeere Balamu Campaign’ egenda okumalira ddala emyaka esatu miramba era ebune mu masaza gonna.
“Mu nteekateeka z’okulwanyisa obulwadde bwa Kkookolo zetwalina mu Bulange nga 1, 03, 2024 kyazuulwa nti abantu baffe bangi balwadde ddala. Abalwadde bano tebalina busobozi bwa nsimbi okusobola okwetuusaako obujjanjabi mu bujjuvu so nga amalwaliro n’ebifo abantu webasobola okufuna obujjanjabi n’okukeberebwa bitono ddala,” Bwatyo Nnyinimu bw’ategeezezza.
Beene agamba nti olw’embeera eno ekitongole ki Kabaka Foundation kikoze enteekateeka okusembereza abantu obujjanjabi mu masaza gabwe gyebawangaalira okuyita mu nsiisira z’ebyobulamu era wano akunze abantu be okuvaayo mu bungi basobole okufuna obujjanjabi.
Olusiisira olusooka lwakuyindira ku mbuga ya Ppookino mu Buddu mu Desemba 2024 era lwakumala ennaku bbiri nnamba nga eno abaayo bakwekebeza Mukenenya, Nnalubiri, Kkookolo, Puleesa, ssukaali n’endala nnyingi.
Ye Omukubiriza w’Olukiiko lwa Buganda, Owek. Patrick Luwaga Mugumbule ng’ono akikiridde Kamalabyonna Charles Peter Mayiga agambye nti kaweefube ono ajjidde mu kiseera kituufu ng’ebyobulamu byeggwanga byetaaga okutumbula.
Owek. Mugumbule ategeezezza nti bangi ku bantu b’Omutanda balina endwadde naye tebalina busobozi kufuna bujjanjabi nga bwekityo bangi bakukozesa omukisa guno okutereeza omulamuzi buno.
Ssaabawolereeza w’Obwakabaka era bboodi memba wa Kabaka Foundation, Owek. Christopher Bwanika yeebazizza abavujirizi okukwatizaaako Kabaka ku kaweefube ono.
Minisita w’Ebyobulamu mu Bwakabaka, Owek Nakate kikomeko ategeezezza nti kaweefube wakuyambako okutumbula ebyobulamu by’eggwanga
Ssenkulu wa Kabaka Foundation, Omuk. Edward Kaggwa Ndagala agambye omulimu munene nga gwakuwementa ensimbi ezisoba mu kawumbi kamu n’obukadde 900 nga akunze abavujirizi okwongera okutumbula eby’obulamu nga bayita mukitongole ki Kabaka Foundation.
Supreme Mufti Sheikh Shaban Galabuzi agambye ebyobulamu byetaaga kukwatibwa kitole era asabye gavumenti eyawakati okukwatagana n’Obwakabaka batumbule ebyobulamu.
Omukolo guno gwetabiddwako abakungu ab’enjawulo, abavujjirizi era bangi beesunze omukisa guno ogubaweereddwawo Beene.