Bya Frobisher Mujuzi
Mmengo – Kyaddondo
Tweyanza Ssaabasajja Kabaka, olw’okubeera omusaale mu kutumbula ebyenjigiriza n’ebyobulamu mu Ggwanga lyaffe.
Leero abantu ba Buganda okuva mu ggombolola Kampala Masekati; Kyampisi Kyagwe; ne Kyanamukaaka Ssaabagabo; omuli ne Minista wa Kampala, Minsa Kabanda, Lord Meeya Erias Lukwago n’akulira ekitongole kya KCCA Muky. Sharifah Buzeki, bakiise embuga mu nkola y’oluwalo era baleese ensimbi ezisoba mu bukadde 60.
Owek. Choltilda Nakate Kikomeko, akiikiridde Katikkiro mu kutikula oluwalo, yebaziza abantu okujjumbira oluwalo, ky’agambye nti kizzaamu amaanyi nti emirimu gy’Obwakabaka gijja kwongera okutambula.
Minisita Nakate yebazizza abazadde, okuteekateka abaana okutuula P.7 ne s4 kyokka n’awabula nti ebibalo biraga abaana ebitundu 39 ku buli kikumi bokka be beyongerayo ku mutendera ogwa siniya ky’agambye nti kitiisa nnyo kubanga kiraga nti baana bawanduka mu masomero nga tebamazeeko, bwatyo abakubirizza abazadde okufuba ku albaana bamalirize emisomo. Asabye n’abazadde obutakoowa ku baana, bababeeere kumpi, mu luwummula luno oluwanvu obutabeera mu bitabagasa.
Minisita Nakate awadde eddoobozi ku mbeera y’ebyobufuzi eriwo; “tuleme kukozesa bigambo bibi, na kuyuza bifaananyi bya bannaffe, wabula twagala okulaba okulonda okulimu obumu n’obwagazi eri ensi yaffe, Uganda!”.
Abakulembeze, ab’enjawulo mu bubaka bwabwe beeyanzizza Maasomoogi olw’okukulemberamu obuteerevu enteekateka z’ebyobulamu n’ebyenjigiriza nga bagamba singa si ye, abantu n’abakulembeze mu kibuga kya Kampala bandibadde ku buzito bwa maanyi okutuusa ku bantu obuweereza obujjuvu.
Omumyuka wa Ssebwana Kayongo Vincent akulembeddemu abakiise Embuga yebazizza abantu ba beene olw’okukiika embuga n’abakuutira okwegendereza ebiseera by’ebyobufuzi obutabiganya kubawulayawula banywerere ku Kabaka era batunuulire ekiruubirirwa ekikulu eky’okuzza Buganda ku ntikko.