Bya Gerald Mulindwa
Mmende – Busiro
Ssaabasajja Kabaka akungubagidde Dr. Florence Namulwana Nsubuga Bwanika, Mukyala w’Oweekitiibwa Christopher Bwanika, aziikiddwa olwaleero ku kyalo Mmende e Wakiso mu Busiro.
![](https://gambuuze.ug/wp-content/uploads/2021/01/140790115_3669069966504903_453853432591674777_n.jpg)
Mu bubaka bwe obusomeddwa Katikkiro Charles Peter Mayiga, Ssaabasajja agambye nti, “Obubaka obumbikira Mukyala wo omwagalwa Dr. Florence Namulwana Nsubuga Bwanika nabufunye, kitalo nnyo! Tukusaasidde nnyo nnyini olw’okufiirwa mukwano gwo akubadde ku lusegere era ng’abadde y’akuyamba mu buli nsonga. Mu ngeri yeemu tusaasira abaana olw’okufiirwa Maama alwalidde ebbanga ettono ddala.
Omugenzi wamutwanjulira emirundi egiwerako era twalaba ekisa n’obuntubulamu by’abadde nabyo, kyakusaalirwa nti afiiridde mu kiseera ekizibu ng’embeera tesobozesa ku musiibula nga bwe kisaanidde.
Twebaza Katonda olw’ebirungi byonna byamusobozesezza okukola. Mukama akusibe ekimyu mu kiseera kino eky’obuyinike era akuwe amaanyi n’obuvumu okuyita mu mbeera eno enzibu.”
Omukolo gw’okusiibula omugenzi gwatandise n’okusaba okwakulembeddwamu Bishop Micheal Ssenyimba. Okuziika kwetabiddwako, Omulangira David Kintu Wasajja, Omumyuka wa Katikkiro owookubiri era Minisita w’ebyensimbi n’okuteekerateekera Obwakabaka, Baminisita ba Kabaka, Katikkiro eyawummula Eng. J.B Walusimbi, abakiise mu Lukiiko lwa Buganda, Bassenkulu b’ebitongole by’Obwakabaka, abaweereza b’Obwakabaka, abakungu ba gavumenti yaawakati n’abalala.
Omugenzi Dr. Namulwana yafudde kirwadde kya Ssennyiga Corona era wano Katikkiro Mayiga w’asinzidde n’asaba abantu okwongera okukyekuuma.