Bya Ssemakula John
Kampala
Abakulira essomero lya Gayaza High School batangaazizza ku katambi akasaasaanidde ku mutimbagano nga kalaga omuyizi agambibwa okubeera ow’essomero lino nti yakwatiddwa nga asera, ekintu kye bagamba nti si kituufu.
![](https://gambuuze.ug/wp-content/uploads/2020/10/122073520_3545152748864501_5217764558512164979_o-1.jpg)
Ebbaluwa eteereddwako omukono gw’omukulu w’essomero lino, Kizito Robinah Katongole, ku Mmande eno, eraga nti ono takyali muyizi waabwe kuba yakola ebibuuzo bye ebya S.6 mu mwaka gwa 2014.
Ebbaluwa ennyonnyola nti ono yeeyongerayo ku mutendera gwa Ssettendekero (University) era ng’eno gye yatabukira omutwe.
“Gayaza High School etegedde ku katambi akasaasaanidde omutimbagano nga kaafulumiziddwa omukutu gwa BigEye.Ug nga kalaga nga omu ku bayizi baffe bweyabadde yeeyisa mu ngeri eyeesittaza,” Ekiwandiiko kya Kizito bwe kitegeezezza.
Ebbaluwa eno egattako nti, ekikolwa kino tekyabadde ku ssomero lino kubanga n’omuyizi ayogerwako yalivaamu dda.
Omukulu w’essomero, Kizito annyonnyodde nti essomero lyakwataganye dda ne bazadde b’omuwala ono, okulaba ng’afuna obujjanjabi bwe yeetaaga mu kiseera kino n’okulaba ng’assuuka.