Bya Ssemakula John
Kampala
Bannakyewa bakubye gavumenti ya Uganda mu kkooti ku musolo Minisitule y’ebyenfuna gweyateeka ku mayumba agapangisibwa nga bagamba nti tebagoberera mateeka mukuguyisa.
![](https://gambuuze.ug/wp-content/uploads/2020/09/property-tax-rentals-1024x576.jpg)
Bano aba ‘The Open Forum Initiative (TOFI)’ omusango bagututte mu kkooti enkulu etawulula enkayana mu Kampala ku Mmande.
Bannakyewa balaze nga Minisita w’ebyensimbi bweyakozesa obubi obuyinza obumuweebwa etteeka ly’omusolo (Income Tax Act) era nga n’okugukuba mu kyapa kya gavumenti (Uganda Gazette) nga palamenti teguyisizza kyali kikyamu.
Bannakyewa bano bagambye nti,“Etteeka lino erilagira amayumba agapangisibwa okugyibwako omusolo lyayisibwa tebagoberedde mitendera mituufu mu palamenti nga bwekiragira mu mateeka.”
Banyonyodde nga etteeka lino ely’omusolo bweliragira okuteekawo ssente ezawansi ezirina okutandikirwako okusasulwa naye kino nakyo tekyakolebwa olw’okuba palamenti teyatuula kuteesa ku tteeka lino.
Wano webasinzidde okusaba kkooti esazeemu etteeka lino kubanga Minisita w’ebyensimbi okulikuba a mu kyapa (Uganda Gazzette) nga Palamenti temaze kuliyisa kyali kikyamu.
Bannakyewa bagala kkooti elagire ekitongole Ki ‘Uganda Revenue Authority (URA)’ obutateeka tteeka lino mu nkola kubanga liriwo mu bukyamu.
Omusolo gw’amayumba gwegwo omuntu gwasasula ku magoba ga ssente zakungaanya okumala omwaka ku bintu ebipangisibwa okukoleramu nga ennyumba, ettaka ne wofiisi.
Era nga omusolo guno gwa njawulo ku gwa bizineensi era nga gusasulwa omuntu oyo alina ebifo ebipangisibwa.