Bya Ssemakula John
Kampala
Ekibiina kya Forum for Democratic Change (FDC) kisabye gavumenti ekyuse obudde bwa kafyu okuva ku ssaawa emu ey’akawungeezi budde ku ssaawa 4 ez’ekiro, kiyambe abantu okumaliriza emirimu gyabwe basobole okudda eka mu mirembe.
Amyuka omwogezi w’ekibiina kino, John Kikonyogo agamba nti ab’ebyokwerinda bakozesa kafyu okubba mu bantu ssente naddala abo abakandaalira mu kalippagano k’ebidduka nga badda ewaka.
“Abantu batandika okudda ewaka ku ssaawa 12 nga beewala okukwatibwa kafyu naye ne beesanga nga balemedde ku kkubo, ekireetawo akalippagano k’ebidduka olwo ebiseera bonna ne babimalira awo, omuntu agenda okuva mu Kalippagano ng’essaawa za kafyu zaatuuse dda.” Kikonyogo bw’agambye.
Okusinziira ku FDC ate bw’ogattako kafyu eyateekebwa ku boodabooda ne gujabagira kuba boodabooda bakolera mu kaseera ng’abantu badda ewaka kyokka ate tebakkirizibwa kukola kusukka ssaawa 12 wadde nga kafyu w’abantu bonna ate atandika ssaawa emu.
Wano we basinzidde ne basaba gavumenti ekkirize kafyu adde ku ssaawa 4 ez’ekiro kuba ebiragiro ebyateekebwawo ab’ebyokwerinda babikozesa bubi nga n’abamu ku bantu bafiiriddwa obulamu ate abalala bafunye ebisago ebyamaanyi.
Wiiki ewedde, omuteesiteesi omukulu owa Minisitule y’ebyensimbi, Ramathan Ggoobi, yalaga nti eggwanga okutereera obulungi, gavumenti erina kuggulawo n’ekkiriza abantu abakola ekiro okuddamu okukola awatali ekyo, ebiwundu omuggalo gwa COVID-19 bye gwaleeta sibyakuwona kati.
Ye Pulezidenti Yoweri Museveni bwe yali ayogerako eri eggwanga yalaga nti kafyu w’essaawa emu akyaliwo okutuusa mu January w’omwaka 2020, eggwanga lyonna lwe lisuubirwa okuggulwawo.