Bya Ssemakula John
Kampala
Ekibiina kya Forum for Democratic Change (FDC) kisabye gavumenti eyawule Minisitule y’ebyenjigiriza ku by’emizannyo okusobola okubiwa ensimbi ezimala n’okutumbula ebitone.
Bano kino baakiyisizza mu amyuka omwogezi w’ekibiina, John Kikonyogo, bwe yabadde ayogerako eri bannamawulire ku Mmande n’ategeeza nti eno yeemu ku ngeri gavumenti gy’eyinza okulaga nti efaayo ku by’emizannyo.
“Bw’oba oyagala okufuna mu by’emizannyo, eby’emizannyo byawule ku by’enjigiriza. Ebisaawe byonna bitundiddwa tulina okubizzaawo. Nga FDC tulowooza nti okufuna mu by’emizannyo tulina okuteekamu ssente, okutendeka era tuliise bannabyamizannyo baffe.” Kikonyogo bwe yagambye.
Bino we/bijjidde n’eggwanga likyali mu kujaguza olw’abaddusi b’emisinde okuli Joshua Cheptegi ne Peruth Chemutai, okuwangulira Uganda emidaali gya zzaabu mu mpaka za Olympics eza 2020 ezayindidde mu kibuga Tokyo ekya Japan. Uganda yawangudde emidaali 4, n’ekwata kyakubiri mu mawanga ga Africa.
Kikonyogo yagambye nti ekiseera kituuse gavumenti eyongere ssente mu by’emizannyo kuba singa bakola kino kibeera tekyetaagisa kupangisa kampuni z’ebweru okutunda ekifaananyi kya Uganda mu mawanga amalala okutumbula eby’obulambuzi.
Ono asabye n’ensimbi eziweebwa bannabyamizannyo nga bagenda ebweru w’eggwanga zongerweko kuba embeera nga bw’eri kati bannabyamizannyo naddala abaddusi kumpi be beeyimirizaawo era gavumenti ebalowoozaako nga bamaze kuwangula.
Kinajjukirwa nti ababaka nga Allan Ssewanyana bazze basaba gavumenti eyawule ebyemizannyo ku by’enjigiriza kuba enkizo eweebwa Minisitule y’ebyenjigiriza so si byamizannyo.
Bwe yali asiibula ttiimu eyagenda mu Olympics, Pulezidenti Museveni yagamba nti gavumenti ye ekoze kinene okutumbula ebyemizannyo era n’asaba bannayuganda okujjumbira ebyemizannyo kisobozese eggwanga obutasindika bakungu bangi okusinga abazannyi.
Kikonyogo era asabye gavumenti okuggula omukutu gwa Facebook n’ategeeza nti kino kiremesezza bbizineesi z’abantu nnyingi era ne kiremesa abantu okutunda ebintu byabwe ku mutimbagano.