Bya Ssemakula John
Masengere – Mmengo
Abakulira leediyo ya CBS FM bakwasizza omuzira mu bazira omuwanguzi w’ Entanda ya Buganda ebirabo ebitamuweebwa mu Lubiri e Mmengo ku mukolo ogwaliko empaka z’akamalirizo nga Desemba 31 nebategeeza nti ey’omwaka 2023 essira ligenda kubeera ku kulwanirira Obutondebwensi awamu ne Saayansi okutumbula obuwangwa n’ennono.
Ebirabo bino Omuzira mu bazira, Julius Buwemba bimukwasiddwa Ssenkulu wa CBS, Omuk. Michael Kawooya Mwebe ku mukolo ogubadde wano mu bimuli bya Bulange.
Omuk. Michael Kawooya Mwebe ategezezza nti entanda ya Buganda 2023, essira ligenda kussibwa nnyo ku kulwanirira Obutondebwensi wakati mukutumbula obuwangwa n’ennono nasaba abanaagyetabamu okukola okunoonyereza ku nsonga ezo.
Amyuka akulira ebigenda ku mpewo ku mukutu gwa 89.2, Martin Oscar Kintu agamba Entanda ya Buganda egasse ettoffaali ddene ku nkulaakulana y’abantu mu ngeri ezitali zimu naddala ku byenjigiriza n’okubangawo emirimu.
Omuwanguzi w’omwaka 2022, Julius Buwemba yeebazizza olw’omukisa ogwamuweebwa nasobola okukyuusa obulamu bwe era n’okumuwa omukisa okubaako byayiga.
Ono ebimu ku birabo byeyawangula kwaliko obukadde 5 mu buliwo, Pikipiki, Chest Freezer, omufaliso, n’ebintu ebirala.
Eyakwata ekifo eky’okubiri, Jude Nakaana, yaweebwa obukadde 3.5, pikipiki, chest Freezer, omufaliso awamu n’ebirabo ebirala.
Ate eyakwata eky’okusatu Muwulya Joseph, ekyokuna Luyinda Dezideerio, Tebuseeke Gerald ne Mugambe Kamulali abatuuka ku luzannya lw’akamalirizo nabo bafunye ebirabo ebyamaanyi ddala.
Abafunye ebirabo beebazizza Obwakabaka olw’okussaawo leediyo ya CBS ebawadde omukisa mu ngeri ezenjawulo nebasobola okutumbula embeera zabwe.