![](https://gambuuze.ug/wp-content/uploads/2020/01/DSC_0236-1024x683.jpg)
Katikkiro wa Buganda Charles Peter Mayiga agambye nti ettaka lya Mayiro ssi lyerivaako emivuyo ku ttaka nga bwebyogerwa abantu abamu. Bwabadde ayogera mu lukiiko lwa Buganda olusookedde ddala mu mwaka Mayiga anokoddeyo ensonga mukaaga z’agambye nti ze ziviiriddeko emivuyo ku ttaka okweyongera.
“Ensonga ye’takka nkulu nnyo bwe tutagiddingana tuyinza okufuna obuzibu. Ensonga zino singa zigonjoolwa, ebizibu by’ettaka bijja kutereera. Poliisi nnafu mu kunoonyereza ku nsonga z’ettaka. Kkooti nnafu mu kulamula ensonga z’ettaka mu budde, era mu bwenkanya, eky’okusatu, okweyongera kw’obungi bw’abantu songa ettaka teryeyongedde. Kino kitegeeza nti enkaayaana zeyongera ate poliisi n’ekkooti nga nnafu,” Mayiga bwagambye.
Mu nsonga endala, Mayiga agambye mulimu okukaddiwa kw’ettaka, emivuyo mu woofiisi ezikola kunsonga z’ettaka saako n’okuyingiza eby’obufuzi mu nsonga z’ettaka.
“Ekivaako obuzibu si ttaka lya mayiro. Ettaka lya Mayiro libaddewo okuva mu 1900 lwaki tewaaliwo nkayaana zino, lwaki emivuyo gitandise kati. Oli bwajja n’akulimba nti mayiro evaako obuvuyo aba alina ebibye byanoonya era omulamuzi Bamugamereire bweyakola alipoota ey’ekiseera n’agamba nti bajjewo ettaka lya Mayiro n’amugamba nti olimba,” Mayiga bwagambye.
Bamugemereire, yalondebwa okukulira akakiiko akakola ku kunoonyereza ku mivuyo ku ttaka era nga kano gyebuvuddeko kaamaliriza emirimu gyako nga ekirindiriddwa kwe kuwaayo alipoota.
Mungeri y’emu Mayiga era asabye abantu ba Uganda okwewala okwagala obugagga obwamangu. Agambye nti abantu bangi babiddwa mu ngeri eno bangi.
“Ekintu kyonna ekikusuubiza ssente eza amangu oba amagoba amangi olubeerera kibeera kya bulimba kibeera kifu. Musaana okwewala amagendo ne diiru. Oteekwa okubaako ky’otunda oteekwa okubaako ky’osuubula. Obusuubuzi tosobola ku bufunamu nga ebbanga ggwanvu teriyiseeyo; tekisoboka,” Mayiga bweyagambye.
Olukiiko nga lubadde lukubirizibwa sipiika Patrick Luwaga Mugumbule era lufunye alipoota ku nkola ya Namutaayiika, ng’eno eyanjuddwa omumyuka wa Katikkiro asooka Oweek. Twaha Kigongo Kaawaase.
Minisita avunanyizibwa ku by’obuwangwa Kyewalabye Male naye ayanjudde alipoota ku nteekateeka y’okutumbula eby’obulambuzi.
Oweek. Prosperous Nankindu Kavuma naye ayanjudde enteekateeka y’Obwakabaka ku yinsuwa ya Tubeere balamu.