Eyeesimbyewo ku ludda oluvuganya Hakainde Hichilema, awangudde Pulezidenti wa Zambia abaddeko Edgar Lungu.
Hichilema ng’alinze kulayira, Pulezidenti Lungu abaddeko yamuwangudde n’obululu obusoba mu kakadde akalamba.
Ono okuwangula akalulu abadde yeesimbyewo okuvuganya omulundi ogwomukaaga era abawagizi be ne gye buli eno bakyagenda mu maaso n’okuyisa ebivvulu mu kibuga ekikulu Lusaka.
Pulezidenti Lungu oluvannyuma lw’okuwangulwa yavuddeyo n’ategeeza nti akalulu k’omulundi guno kaabaddemu okubbira era tekaabadde k’amazima na bwenkanya.
Ono yalumirizza ng’abakungu okuva mu kibiina kye ekya Patriotic Front Party bwe baagobeddwa mu bifo awaalondeddwa ne balemwa okukuuma obululu bwe.
Wabula enkambi ya Hichilema n’ekibiina kya United Party for National Development, yagambye nti ebigambo bya Lungu byabadde biraga nti asobeddwa era takyamanyi kyakuzzaako.
Mu byalangiriddwa akakiiko k’ebyokulonda okuva mu kalulu akakubiddwa ku Lwokuna byalaze nti Hichilema yafunye obululu 2,810,777 ate Lungu
“ Nangirira nti Hichilema y’alondeddwa okubeera Pulezidenti wa Zambia.” Ssentebe w’akakiiko k’ebyokulonda Esau Chulu bwe yalangiridde.
Obuwanguzi buno bwe bwakomekkerezza emyaka gya Lungu omukaaga gy’amaze mu bukulembeze, abasinga gye bagamba nti gibaddemu obulyi bw’enguzi, okulinnyirira eddembe ly’obuntu awamu n’ebbula ly’emirimu.
Okusinziira ku bakugu, bino bye byaleetedde abantu okwesiga Hichilema era kati obuvunaanyizibwa obumwolekedde kwe kulaba oba anaasobola okutereeza ebyenfuna by’eggwanga.