Bya Musasi Waffe
Kampala
Olunaku lw’eggulo ku makya, eyaliko ddereeva w’ekitongole ky’amawanga amagatte yakubiddwa abavuzi ba boodabooda nebamutta oluvannyuma lw’okukona munnabwe e Mmengo mu Kampala.
Okusinziira ku beerabiddeko, obuzibu bwavudde ku Aziz Bashir,40 eyaliko ddereeva w’ekitongole ky’ensi yonna nga kigambibwa nti owa boodabooda yakolobodde ku mmotoka ya Aziz ey’ekika kya Toyota Allex.
“ Ddereeva yafulumye nagezaako okuteesa nowa boodabooda okulaba engeri gyebasobola okuddaabiriza emmotoka ye. Aziz yabadde ayagala emitwalo 50 wadde owa boodabooda yabadde ayagala kumuwa mitwalo 5 nga agamba ye zaalina. Kino kyanyizizza ddereeva,” Eyeerabiddeko bwe yagambye.
Bano olw’okulemererwa okukaanya kigambibwa nti Aziz yazzeeyo mu mmoyoka ye nagezaako okutomera owa boodabooda wabula ate namaliriza nga akoonyemu mulala era namukulula okumala akabanga.
Amyuka omwogezi wa poliisi mu Kampala n’emirilaano, Luke Owoyesigyire, yategeezezza nti wadde okusooka akabenje kano tekabadde kamaanyi naye Aziz neyamutomedde balemeddwa okukaanya era wano ebizibu webyavuddde.
“ Wano ababoodabooda babiri bagezezaako okusiikiriza Aziz aleme kutuuka ku munnabwe era eyabadde amutomedde nasobola okuvaawo, naye omugenzi bweyabadde agezaako okugoba eyamutomedde natomeramu owa boodabooda omulala,” Owoyesigire bwe yannyonnyodde.
Ekyaddiridde kye kibinja kya boodabooda okwebulungulula emmotoka ya Aziz nga yakatuuka ku ssomero lya Lyna Primary School, nebatandika okugyonoona era naye nebamusikamu olwo nebatandika okumukuba okutuusa lwe bamusse.
“Emmotoka y’omugenzi ne Pikipiki eyavuddeko obuzibu nnamba UEJ 515K bikuumirwa ku poliisi ya Old Kampala ate omulambo gwa Aziz gwatwaliddwa mu ggwanika e Mulago abasawo basobole okwongera okugwekebejja,” Owoyesigire bwe yagasseeko.
Okusinziira ku poliisi, babiri ku bagambibwa okwetaba mu kikolwa kino bakwatiddwa nga poliisi bwekozesa kkamera zaayo endala okuzuula n’abalala.
Ono alabudde ababoodabooda okukomya okutwalira amateeka mu ngalo era nakakasa nti abakwate bagenda kutwalibwa mu mbuga z’amateeka bavunaanibwe.