Bya Shafik Miiro ne Tamale Henry
Lweza – Busiro
Ekkeleziya ya St. Joseph Catholic Parish Lweza ejaguza emyaka 52, nga eno eweerereza wansi w’Essaza ekkulu ery’e Kampala, era ekitambiro Kya mmisa kikulembeddemu Msgr. Dr. Lawrence Ssemusu.
Katikkiro Charles Peter Mayiga akiikiriddwa Oweek. Noah Kiyimba mu kusaba kuno, era mu bubaka bw’amutisse yeebaziza nnyo obukulembeze bw’Ekkeleziya eno olw’okukulaakulanya ekifo kino wamu n’okuzimba abantu mu mwoyo, era abasabye okugenda mu maaso. Ayongeddeko n’okwebaza bwanamukulu Rev. Fr. Emmanuel Ssewanyana ne baawereza nabo mu kifo kino olw’okukirabira obulungi.
Mukuumaddamula yeebaziza abakiristo olw’okuwagira enteekateeka z’Ekkeleziya era abasabye okwongera okunnyikiza obukulisito, olwo ekkeleziya eno efuuke eky’okulabirako eri ebifo ebirala mu ssaza ery’e Kampala. Abayozaayozeza okutuuka ku myaka 52, era n’abaagaliza ebijaguzo ebirungi.
Msgr. Dr. Lawrence Ssemusu mu kubuulira kwe akubirizza abantu ba Katonda okwagaliza bannaabwe ebirungi mamu n’okukola ebintu byebaba batandise n’obumalirivu okusobola okubimaliriza, era abakubirizza okwekwata ku Katonda mu mbeera yonna awatali kumukwenyakwenya.
Ku lulwe Oweek. Noah Kiyimba, Minisita wa Kabineeti, Olukiiko, Abagenyi n’Ensonga ez’Enjawulo mu woofiisi ya Katikkiro ayozaayozeza bannalweza mu kigo kino olw’okutuuka ku kkula ery’emyaka 52. Akubirizza bakristo okubeera n’omukwano eri abalala, beewale okweyagaliza bokka na bokka, wabula buli omu okwagaliza munne ekisinga okuba ekirungi, olwo bajja kunyweza obumu n’omukwano wakati waabwe.
Ebisomesa (Sub -Parish) ebiri mu Lweza Parish biwerako nga kkumi (10) omulundi guno ebadde aba Our Lady Of Guadalupe Kiwamirembe be bakulembeddemu okutegeka ebijaguzo by’omwaka guno.
Okusaba kw’okujaguza kuno kwetabiddwamu abantu ba ba Katonda ab’enjawulo, okubadde bannaddiini, bannabyafuzi, abakulembeze ab’emitendera egy’enjawulo n’abaweereza ba Katonda abalala.