Bya Ssemakula John
Kampala
Emmotoka y’akulira ekibiina kya National Unity Platform, Robert Kyagulanyi, amanyiddwa nga Bobi Wine etayitamu masasi, byonoonese oluvannyuma lwa kkooti okugaana okuyisa ekiragiro ekigaana ekitongole ky’emisolo ekya URA okuddamu okugyekebejja nga bwe yali asabye.
Bobi Wine yali yaddukira mu kkooti ng’asaba eyimirize ekitongole kya URA okuddamu okwekebejja emmotoka ye ng’agamba nti yagifuna mu mateeka era n’asasula emisolo gyonna egiragirwa mu mateeka era ne bagimuwa.
Kino kyaddirira Kamisona wa URA akola ku kuyingiza ebintu mu ggwanga, Abel Kagumire, okuwandiikira Kyagulanyi ng’amutegeeza nti emmotoka eno bagyetaaga okuddamu okugyekebejja n’okakasa oba yasasula emisolo mu butuufu bwaggyo.
Okusinziira ku Kagumire, emmotoka eno bwe yali eyingizibwa mu ggwanga baagiwandiika ng’eyabulijjo era balowooza nti emisolo gye yasasula giri wansi bwe kiba kituufu nti teyitamu masasi. Olwaleero Omulamuzi wa kkooti enkulu etawulula enkaayana agaanye okuyimiriza URA ng’agamba nti ensonga munnamateeka wa Kyagulanyi z’awa tezimatiza.
Omulamuzi Baguma ategeezezza nti okuwa ekiragiro nga Kyagulanyi ky’asaba, omuwaabi alina okukakasa kkooti nti ajja kufiirizibwa nnyo oba okukosebwa singa kibeera tekiweereddwa. “Okusinziira ku munnamateeka w’omuwaabi, ky’asinze okweraliikirira mu kuzzaayo emmotoka eno yeekebejjebwe kwe kuba nti omuwaabi gy’akozesa era yagifuna lwa byakwerinda bye. Naye kkooti eno tematidde na nsonga ezo,” Omulamuzi Baguma bw’agambye.
Omulamuzi Baguma agasseeko nti olw’okuba oludda oluwaabi lwalemeddwa okukakasa kkooti nti emmotoka eno bweddayo ajja kufiirizibwa oba okufuna obuvune obwamanyi okusaba kwe akugobye.
Kati kino kitegeeza nti singa Kyagulanyi alemwa okutwetwalirayo emmotoka ku URA, ekitongole kigenda kuginona mu maka ge kisobole okuddamu okugyekenneenya nga kkooti bw’eragidde.
Akalippo akalala ak’olekedde Kyagulanyi kwe kubeera nti emmotoka ezitayitamu masasi tezimala gayingizibwa mu ggwanga era omuntu okugireeta alina kusooka kufuna lukusa okuva mu ggye lya UPDF, ekintu Kyagulanyi kyataakola.
“Emmotoka ezitayitamu masasi tezimala gayingizibwa era amateeka tegakkiriza okutuusa ng’ofunye olukusa okuva mu UPDF era kyandigwanidde omukulu Kyagulanyi okukolagana obulungi ne URA okumalawo okusika omuguwa ku nsonga eno.” Ekitongole kya URA bwe kyategeeza.