Bya Ssemakula John
Bulange -Mmengo
Minisita avunaanyizibwa ku by’obulamu ebyenjigiriza n’embeera z’abantu mu Buganda, Owek. Dr. Prosperous Nankindu Kavuma ategeezezza nti emisinde gy’amazaalibwa ga Kabaka egy’omulundi guno ag’e 66 gisikiziddwa ebyooto olw’ensonga nti gibadde gyakaggwa olw’ekirwadde kya Corona ekyagitataganya.
![](https://gambuuze.ug/wp-content/uploads/2021/04/vlcsnap-2021-04-01-10h38m06s318-1024x576.png)
Bino Minisita Nankindu abyogedde ayanjula enteekateeka y’ebikujjuko ebigenda okulembera amazaalibwa g’omutanda ag’omwaka guno.
Owek. Nankindu annyonnyodde nti ekirwadde kino kyakosa nnyo eggwanga lya China gyebabadde bajja ebikozesebwa naye bakusigala ku mulamwa Beene gweyasiima ogw’okulwanyisa Mukenenya ku byooto ebigenda okubeera ku ggombolola ne Miruka okwetoloola Buganda.
“Beene yasiima omulamwa okubeera ogwa ‘Abavubuka babeere basaale mukulwanyisa Mukenenya’ era abavubuka benyigiddemu bali mu nteekateeka era bajja kuggusa ensonga ya Ssaabasajja Kabaka,” Minisita Nankindu bw’agambye.
Minisita alambuludde nti ebyoto bino byebigenda okukozesebwa okuyisibwako obubaka bwokulwanyisa mukenenya olw’ensonga nti emisinde tegisobose kubaayo mwaka guno.
Okusinziira ku nteekateeka eyanjuddwa, ku Lwokutaano nga 2 waakubaawo okusabira Kabaka mu mizikiti okwetoloola Buganda ate abadiventi bamusabire nga 3 olwo ata Eklezia ne Kkanisa bamusabire nga 4 era okusaba okukulu kwakubeera mu lutikko e Lubaga.
Mu bikujjuko ebirala, wakubaawo omusomo gw’abakulembeze mu Buganda ogugenda okubeera ku Entebe Imperial Hotel nga 6, 7, 8 okubamanyisa abantu ku mukenenya n’enteekateeka endala.
Minisita Nankindu alaze nti enteekateeka za Bulungibwansi n’okuyooyoota olubiri okutuukana n’omutindo zakubeerawo nga 12/ April/ 2021 olwo enkeera ebeere entikko y’omukolo.
Okusinziira ku Minisita omukolo gwakubeera mu Lubiri e Mmengo era gwakutandika ku ssaawa 4 ez’okumakya wabula gwa bagenyi bayite bokka olw’okutangira ekirwadde kya sennyiga Corona.
Ate ye Ssentebe w’abavubuka mu Buganda, Omuk. Baker Ssejjengo ategeezezza nti buli kimu kitambula bulungi era buli kimu bakikoze okwongera okumanyisa abantu ku kirwadde kya Mukenenya.