Bya Musasi waffe
Kampala
Ebyakava mu kunoonyereza kwa poliisi ku kyavaako omuliro ogwayokya ekisulo ky’essomero lya Kings College Buddo ekiyitibwa Grace, bitiisa oluvannyuma lw’abakugu mu poliisi okulaga nti guyinza okuba nga gwali mugenderere.
Ku Lwokubiri lwa wiiki eno, ekisulo kino kyakwata omuliro era ebintu by’abayizi ebiwerako byonna ne bisaanawo.
Okusinziira ku mwogezi wa poliisi mu Kampala n’emiriraano, Luke Owoyesigire, tewali mwana yenna yafuna kisago kuba baali bamaze okugenda okusoma.
Abanene ab’enjawulo mu ggwanga baalambudde essomero lino omwali Omulabirizi Wilberforce Kityo Luwalira era bonna baasabye poliisi ku mulundi guno okwanguya alipoota ku kituufu ekyavuddeko omuliro guno.
Kati poliisi egamba okunnoonyereza okwakoledde ekitongole ky’ebyomuliro n’okununula abantu mu poliisi biraga nti omuliro guno gwali mugenderere.
Owoyesigire agamba nti bye balina biraga nti omuliro guno gwatandikira ku ddinisa awatali masannyalaze gonna nga kizibu okugamba nti omuliro gwava ku masannyalaze. Ono annyonnyodde nti balina n’abantu be bafunyeeko sitatimenti ku byaliwo era nga bano bakozi ku ssomero lino naye mu kiseera kino tebasobola kwasanguza mannya gaabwe kati.
Owoyesigire agamba nti baliko n’omukozi omu ku ssomero lino gwe basigaza okumuwa obukuumi kuba aliko amawulire ag’enkizo ge yabawadde. Eyakuliddemu okunoonyereza kuno era akulira ekitongole kya ‘Fire’, Hassan Kihanda agamba bye bazudde si bye byenkomeredde.
Mu kiseera kye kimu poliisi y’e Nateete nayo eri mu kunoonyereza ku muliro ogwakutte ku kisulo kya King’s Fahad Islamic e Busega nga nagwo gwakwata ku lunaku lwe lumu ne gusaanyaawo ebintu by’abayizi. Guno abakugu basuubira nti gwavudde ku masannyalaze wabula ng’okunoonyereza ku kyagenda mu maaso.