Bya Ssemakula John
Bulange – Mmengo
Ekisaakaate kya maama Nnabagereka eky’omwaka 2024 eky’omulundi ogwe 17, kitongozeddwa mu butongole ku mbuga enkulu mu Bulange e Mmengo n’omulamwa gw’okulafuubanira Obuntubulamu kulw’ ebiseera by’omumaaso ebitangaavu.
Omukolo guno gukoleddwa omubaka wa Ireland mu Uganda, Kevin Colgan neeyebaza maama Nnaabagereka olw’omulimu omunene gwakoze mukugunjula omwana wa Buganda n’ebweru wa Uganda.
Omubaka Colgan anyonnyodde nti omwana agunjuddwa asobola bulungi okugoba obwavu n’okukulakulanya Eggwanga lye kuba abeera afunyeemu kinene.
Ssenkulu w’ekitongole ki Nnabagereka Development Foundation, Adrian Mukiibi ategeezezza nti ebbula ly’obuntubulamu mu bantu kifudde okutandika bizineensi ekizibu nekibalemesa okutandikawo emirimu bwatyo nasaba abazadde okuleeta abaana mu Kisaakaate ky’omwaka guno .
Ye Omukubiriza w’Olukiiko lw’Abataka, Nnamwana Augustine Kizito Mutumba asoomozezza abantu ba Buganda okumanya obuwangwa bwabwe era bakuume ennono yabwe nga bwekiri mu kisaakaate.
Katikkiro wa Buganda Charles Peter Mayiga mu bubaka bwatise omukubiriza w’olukiiko lwa Buganda owek. Patrick Luwaga Mugumbule yeebaziza maama Nnaabagereka olw’okutumbula ennono n’obuwangwa nga ayita mukubangula abaana.
Omukubiriza w’Olukiiiko lwa Buganda, Owek. Luwaga Mugumbule yeebazizza kampuni ezikwatiddeko Nabagereka okugunjula abaana.
Kampuni ez’enjawulo ziwaddeyo obuvujirizi obwenjawulo nga Finance Trust Bank bawaddeyo obukadde 35, MTN bawaddeyo obukadde 14, Uganda National Drug Authority bawaddeyo obukadde 10 nebawera okwongera okukwasizaako Maama Nnabagereka mukuzimba Obuganda
Ekisaakaaate kino kigenda kutandika nga 4, okutuuka nga 21 January 2024 nga Kyakutambulira ku mulamwa ogugamba nti Okulafuubanira Obuntubulamu.
Bbo abakwasiddwa engoma yokutegeka ekisakaate ekyomwaka 2024 Homesdallen nga bakulembeddwa Omukulu w’essomero Kalyango Godfrey Dickson baweze okukola kyonna ekyetaagisa okufuula ekisaakaate ky’omwaka guno eky’enjawulo.
Omukolo guno gwetabiddwako, baminisita bakabaka okubadde minisita wa gavumenti ez’ebitundu Owek. Christopher Bwanika, omukubirizi w’olukiiko lwa Buganda, Owek. Patrick Luwaga Mugumbule, Omukubiriza w’olukiiko lw’Abataka Augustine Kizito Mutumba, omukungu Eddie Kaggwa Ndagala,abaana b’amasomero nabantu abalala bangi.