Bya Ssemakula John
Kajjansi – Entebbe
Wabaluseewo okutya mu bakulembeze bw’ eggombolola y’e Ssisa mu ttawuni kkanso y’e Kajjansi oluvannyuma lw’abasaatuusi okulisibako Sseng’enge awamu n’okutuusa ku mwami w’eggombolola eno obulabe singa yeekiika mu kkubo lyabwe.
Kigambibwa nti omwami w’eggombolola eno, Fred Kato amakya ga leero asanze eggombolola eno eyiiriddwako amayinja n’omusenyi naddala ku kitundu ekiriko ekisaawe nga kyonna kisibiddwako ebikondo.
Oluvannyuma lw’okizuula nti waliwo abasalimbira ku ttaka lino, Omwami w’eggombolola Kato ensonga azitutte ku poliisi y’ekitundu kino n’aggulawo omusango, ono akunze batuuze bano n’eng’oma ya Ggwangamujje ekubiddwa era abatuuze nebakuulayo ebikondo bino.
Ono asabye abajaasi abateekebwa ku mbuga eno baggyibweko oluvannyuma lw’okukizuula nti bano be babadde bawa abasaatuusi bano obukuumi okwezza embuga eno.
Akulembera eggombolola eno Kato agamba nti ekkanisa y’Abalokole eya Voice of Hope naye efuuse kizibu kinene ku ttaka lino kuba wadde baliwo ku bwazike naye ate kati tebaagala kuseguka.
Ono asinzidde wano n’akowoola ekitongole ekya Buganda Land Board okusitukiramu amangu ennyo okulambika nsonga eno kuba ettaka lya Beene lituuse okutwalibwa abasaatuusi.