Bya John Ssemakula
Kampala
Minisitule y’ebyobulamu etegeezezza nti eddagala lya Uganda erigema ekirwadde kya Ssennyiga Corona lituuka wiiki eno ku Lwokutaano. Minisita w’ebyobulamu, Dr. Jane Ruth Aceng y’alangiridde bino leero ku Lwokubiri ng’ayogerako eri bannamawulire, n’agamba nti eddagala erisooka okutuuka liweza ddoozi eziwera 864,000.
![](https://gambuuze.ug/wp-content/uploads/2021/03/4c88e304-efeb-460f-9bda-3fb8775baaed.jpg)
Okusinziira ku Minisita, okugema ekirwadde kino kujja kutandika ku Lwokusatu nga 10/ March/ 2021 nga baakutandikira ku basawo. Eddagala lino liri wansi wa nkola ya COVAX Initiative ng’ebalirirwamu ddoozi eziwera 3,552,000. Ku ddagala lino, 864,000 bwerituuka ku Lwokutaano eddala eriwera 2,688,000 lyonna lyakubeera wano omwezi gwa June 2021 we gunaatuukira.
Okusinziira ku bakugu, Uganda egenda kwetaaga obukadde 45 obw’ eddagala erigema Ssennyiga Corona era lino ligeme abantu abawera obukadde 22 ate eddala liweebwe abanoonyi b’obubuddamu. Minisita Aceng agamba nti mu 2021, Uganda esuubira okufuna ddoozi 17,872,037 ez’eddagala erigema Ssennyiga Corona okuva mu COVAX .