Bya Francis Ndugwa
Bulange – Mmengo
Katikkiro wa Buganda, Charles Peter Mayiga, ategeezezza nti Obwakabaka bwa Buganda baagala ebikolwa eby’okuwamba abantu n’okubatulugunya bikomezebwa mu bwangu kuba bino bigikyayisa era nga bisobola bulungi okugisuula.
“Obwakabaka bwa Buganda busaba abakulu mu gavumenti okumalawo obunkenke, tubasaba okuwamba abantu, okubakuumira mu bifo ebitamanyiddwa n’okubatulugunya bikomezebwe.” Owek. Mayiga bw’agambye.
Katikkiro Mayiga okulaga obwennyamivu abadde asisinkanye abavubuka ba Buganda Youth Council abaawangula ebifo eby’enjawulo mu nsisinkano ebadde mu bimuli bya Bulange e Mmengo. Owek. Mayiga awanjagidde abakulu okumanya nti abalabe baayo si bantu bagivuganya ng’abasiika Capati naye abo abagikyayisa abantu.
“Omuntu ayagala okusuula gavumenti y’oyo akola ebikolwa ebikyayisa gavumenti. Okuwamba abantu ne baggalirwa mu bifo ebitamanyiddwa, okubonyaabonya abakwatiddwa ne batuuka n’okubatta, omwana Ssegawa bamuggyeemu enjala oba okubookya ppaasi, ebikolwa eby’engeri eyo bikyayisa gavumenti. Katikkiro Mayiga bw’agambye. Ono alaze eby’okulabirako ku basajja ba Idi Amin ne Obote abawambanga abantu wabula kino kyanafuya gavumenti zino era ne zigwa.
Kamalabyonna agamba nti abatambulira mu mmotoka z’ekika kya ‘Drone’ balabe ba gavumenti era baagala eveeko.
“Si buli lw’ovuganya gavumenti nti ogiggyako naye buli lw’ogikyayisa oba ogireetera okugwa.” Owek. Mayiga bw’annyonnyodde. Owek. Mayiga asabye abalowoozebwa okubeera n’emisango basooke kunoonyezebwako era bakwatibwe mu ngeri eteeka ekitiibwa mu ddembe lyabwe. Bano Katikkiro Mayiga abasibidde entanda bulijjo obutatiirira Ssaabasajja Kabaka era bwe wabaawo ensonga yonna badde embuga basobole okulambikibwa.
Ate ye Minisita w’obuwangwa n’ennono, David Kyewalabye Male, agambye nti ye ne Minisita Ssekabembe beetikka omulimu okukulembera abavubuka bano n’okubalaga ekkubo. Ono asiimye abavubuka olw’okubeera abamalirivu ne bavaayo okukiikirira abantu baabwe.
“Bano basobodde okulaga eggwanga nti abantu ba Buganda basobola okubeesiga ne babateeka mu by’obukulembeze nga tewali kye babawadde.” Owek. Kyewalabye bw’agambye.
Ye omubaka omulonde owa Nakaseke Central era y’abadde omukubiriza w’olukiiko lw’abavubuka Ttabamiruka, Allan Mayanja Ssebunnya, agambye nti olutabaalo terubadde lwange naye olw’amaanyi g’abantu basobodde okuwangula. “Tuwera mu maaso go, okulwanirira ekyo abantu kye batulabyemu okukituukiriza naye nga mu byonna z’ensonga za Buganda Ssemasonga ettaano era ensonga enkulu mu zino y’ensonga ya Federo.” Omubaka Ssebunnya bw’asuubizza.
Abalala abakomyewo okuwoza olutabaalo kuliko; Bukenya Farok Sansabula, Ssemanda Mathias, Solome Nangooba, Mwagalanyi Ali mudde, Ssemindi Salim, Kibira Aloysious, Kamuli Joseph, Namboowa Rashida awamu n’abalala.