Bya Musasi Waffe
Kyaddondo
Mu mupiira egizannyiddwa olwa leero ku Mmande ttiimu ttiimu ez’enjawulo zitandise n’amaanyi nezitangaaza emikisa gyazo okweyongerayo so nga ate waliwo n’endala ezikwebedde.
Ttiimu y’Ekika ky’Omusu ekubye Engabi ensamba ggoolo 3: 2 mu mupiira ogunnyumidde abalabi wali ku kisaawe kya Kabaka Kyabaggu e Wakiso.
Ggoolo z’ Omusu ziteebeddwa Martin Nsimbe ne Ashraf Zizinga ateebye ggoolo 2 ng’ate ez’Engabi Ensamba neziteebebwa Sula Matovu Maluda.
Omupiira omulala oguzannyiddwa ku kisaawe kino Omutima Omuyanja gukubye Ekkobe ggoolo 1 – 0 so nga ate e Kawanda Engo ekubye Ensenene ggoolo 1 – 0, Omutima Omusagi gukubye Empindi ggoolo 2 – 1
Bbo bazzukulu ba Katongole ab’eddira Ente bagudde maliri ne Bazzukulu ba Kayiira ab’eddira Embogo ggoolo 1 – 1 mu mupiira ogunyumidde ku kisaawe e Wankulukuku.
Ggoolo y’Ekika ky’Ente etebeddwa Peter Lwasa ng’ate Nelson Ssenkatuka yatebye ggoolo y’Embogo
Omupiira omulala oguzannyiddwa olwaleero gubadde wakati wa Eng’onge nga ettunka ne Effumbe era naguno guwedde Maliri ggoolo 1 – 1.
Effumbe lyelisoose okulengera akatimba nga eyita mu muzannyi Jamir Nvule ng’ate ggoolo ye Engoonge etebeddwa John Kisolo ate nga n’Engeye nayo eremaganye n’Ekinyomo 1-1.