Bya Ssemakula John
Kampala
Eyavuganyako ku bwapulezidenti era munnakibiina kya Forum for Democratic Change (FDC), Dr. Kizza Besigye ategeezezza nga gavumenti bw’emanyi obulungi abali emabega w’ebijambiya ebiri mu kitundu ky’e Masaka era abanoonyereza tebalina kugitaliza.
Abatemu b’ebijambiya baazingako ekitundu ky’e Buddu era olwaleero we lutuukidde ng’abantu abasoba mu 30 be baakafiirwa obulamu bwabwe ate ng’abalala bapooca n’ebisago era nga waliwo abakwate 23 ku ttemu lino omuli; ababaka Muhammad Ssegiriinya owa Kawempe North ne Allan Ssewanyana owa Makindye West.
Dr. Besigye ategeezezza nti ensonga z’ettemu lino tolina bw’osobola kuziggyamu gavumenti era y’erina okusooka okunoonyerezebwako.
“Gwe nsooka okuteebereza ye gavumenti. Addako ye muntu alina obutakkaanya ne gavumenti naye tolina ngeri gy’osobola kuggya gavumenti mu ttemu lino.” Besigye bw’agambye.
Ono agamba nti wakati ng’okunnoonyereza ku bateeberezebwa abalala nga kugenda mu maaso, ne gavumenti erina okubuulirizibwako kuba tesobola kwenoonyerezaako nga yo.
“Eno y’ensonga lwaki Uganda twagitwala mu kkooti y’ensi yonna kuba tasobola kwenoonyerezaako.Twetaaga okunoonyereza ku gavumenti eno ku butemu bw’ebijambiya.” Besigye bw’annyonnyodde bannamawulire.
Besigye alumiriza gavumenti gye yaleeta mu buyinza mu 1986 ekulemberwa Pulezidenti Museveni okukola obutabanguko obwengeri yonna, nga kibeera kikyamu okulowooza nti gavumenti terina ky’emanyi ku ttemu eriri mu Buddu kuba Pulezidenti Museveni azze ayawulayawula mu bantu.
Ono asaasidde famire z’abantu abakoseddwa ettemu lino era n’asaba bannamasaka okusitukiramu beekuume era bayambeko okulaba ng’abantu ababakozeeko obutujju buno bavunaanibwa mu mateeka kuba obutemu bwe buti si bupya wadde gavumenti bulabikanga obugiremeredde.