Bya Ssemakula John
Kampala
Amyuka omuwabuzi w’ekibiina kya Democratic Party (DP), alabudde ababaka ba Palamenti ku ky’okuggyawo omukisa gw’okweyimirirwa ku misango eminene nga Pulezidenti Yoweri Kaguta Museveni bw’ayagala, kuba bajja kwesanga mu mbeera y’emu.
Lumu era nga ye mubaka wa Mityana South, agamba nti singa kino kikolebwa, kigenda kuwa Pulezidenti Museveni omukisa omulala okukijjanya abamuvuganya.
Bino Lumu yabyogeredde mu lukung’aana lwa bannamawulire ku City House ku Lwokubiri.
“Ababaka ba Palamenti balina okumanya nti kano katego, singa bakkiriza ne baggyawo okweyimirirwa. Bagenda kuba bakoze ekintu ekigenda okweyambisibwa okutulugunya bannayuganda nga nabo mw’obatwalidde.” Lumu bwe yagambye.
Lumu yannyonnyodde nti Pulezidenti Museveni aludde ng’ayisa olugaayu mu kkooti nga singa ababaka baggyawo okweyimirirwa, embeera egenda kuba eyonoonekedde ddala.
Okusinziira ku Lumu, ebikolwa byonna ebigezaako okuyingirira obuyinza bwa kkooti okusalawo ku ani alina okweyimirirwa, bikontana butereevu n’ekyokuba ng’ekitongole ekiramuzi kyetengeredde nga Ssemateeka bw’agamba.
Lumu yategeezezza nti si nsonga oba Museveni ky’agoba kiyitamu oba nedda naye n’okukubaganya ebirowoozo ku nsonga eno kirina engeri gye kikosaamu enkolagana ya Pulezidenti Museveni n’ekitongole ekiramuzi.
Ono yannyonnyodde nti ng’ekibiina ekirafubanira enfuga ey’amateeka, bagenda kusigala nga bavumirirwa enteekateeka z’okuggyawo okweyimirirwa ku misango eminene, bw’atyo n’asaba ababaka banne okukola ky’ekimu.