Bya Betty Namawanda
Kamapal
Ekibiina kya Democratic Party (DP) kigamba nti ebibinja by’ebyokwerinda gavumenti by’ezze eteekawo mu bbanga eriyise be bayinza okubeera emabega w’ebikolwa by’ebijambiya ebiri mu Masaka.
Bino babyogeredde mu lukung’aana lwa bannamawulire lwe batuuzizza ku Tropical Inn mu Masaka ku Lwokubiri.
Omumyuka wa Ssenkaggale mu Buganda, George Fred Kagimu wano w’asinzidde n’asaba gavumenti okuyitayo abasajja bano mu byalo ne mu bantu kubanga ba bulabe.
“Tulowooza nti ebitongole ebizze biteekebwawo omuli; aba LDU, crime preventers ne flying squad ababirimu baddayo mu byalo. Aba LDU abaggyibwa ku mirimu bali ku byalo batayaaya era abamu ku bano basobola okubeera n’akakwate ku ttemu lino.” Kagimu bwe yategeezezza.
Kati Kagimu ayagala gavumenti bano ebayiteyo mu byalo ebazze mu by’okwerinda okutereeza embeera.
Mu bbanga lya mwezi gumu oguyise abantu abasoba mu 30 battiddwa wadde ebigendererwa by’abo abakola ettemu lino tekinnamanyika.
Kagimu yagasseeko nti abantu abakola ettemu lino bakugu ekiraga nti balina okutendekebwa okutali kwa bulijjo era obukugu bwabwe bufaanagana obwa b’ebyokwerinda.
“Ettemu lino litegeke ekiraga nti abatemu bano babeera batendeke ekibasobozesa okutemula abantu ne bagenda nga tebakwatiddwa.” Kagimu bwe yategeezezza.
Okusinziira ku Kagimu ettemu lino liraga nti gavumenti eremereddwa obuvunaanyizibwa bwayo obusooka obw’okukuuma abantu n’ebintu byabwe.