Bya Musasi Waffe
Palamenti
Minisitule y’ebyenjigiriza etandise okulowooza ku ky’okukkiriza abayizi abatali mu bibiina bimalako mitendera okubayisa bagende mu bibiina ebiddako singa balemwa okudda ku ssomero ng’olusoma lw’omwaka guno telunnaggwaako.
Abayizi abagenda okusuumusibwa beebo abaalekeddwa ku muggalo nga Pulezidenti Yoweri Museveni akkiriza amasomero okuddamu .
Kino kyabikkuddwa Dayireekita w’okusoma okutandikirwako n’amasomero ga Ssekendule Ismail Mulindwa bwe yabadde asisinkanye ababaka ba Palamenti abatuula ku kakiiko k’ebyenjgiriza ku Lwokubiri lwa wiiki eno.
Mulindwa yagambye nti, balina enteekateeka okusobozesa abayizi okusomera awaka kibayambe okusinziirako okuyisa abayizi okugenda mu bibiina ebiddako singa embeera enaaba tesobozesa kuggulawo masomero.
Pulezidenti Museveni bwe yabadde ayogerako eri eggwanga ku mbeera y’ekirwadde kya Ssennyiga Corona yategeezezza nti kabbineeti yasazeewo okuggulawo amasomero eri abayizi abamaliriza emitendera egy’enjawulo okuli P.7, S.4, S.6 n’amatendero agawaggulu.
Ku Lwokubiri luno, Minisitule y’ebyobulamu yafulumizza kalenda y’okusoma egenda okugobererwa okutandika nga Okitobba 15 olw’okusoma kwa ttaamu eyookubiri era nga luggwako mu mwezi gwa Desemba 2020.
Okusinziira ku nteekateeka eno, ttaamu eyookusatu egenda kutandika mu Janwali ekomekerezebwa mu mwezi gwa Apuli.
Mulindwa yannyonnyodde nti nga bakolaganira wamu ne National Curriculum Development Centre (NCDC) bateeseteese dda obutabo omuli ebisomesebwa obugenda okuweebwa abayizi kibayambe okumalayo ebiri mu lusoma (Syllabus).
Ono yakakasizza ababaka nga bwe baatandikako edda ku kusomeseza abayizi ewaka okumala ssabbiiti nnya nga kino bakikolera ku leediyo ne ttivvi wamu n’empapula ezaweerezebwa eri abayizi mu bitundu ebyenjawulo kibayambe obuteerabira ebyo bye bamala edda okusoma.
Mulindwa yagambye nti olw’okuba abayizi abamu bakyali ku muggalo, minisitule yaakuwa abayizi obutabo obulala kibayambe okumalako olusoma luno basobole okubayisa okugenda mu bibiina ebirala.