Bya Ssemakula John
Lubiri – Mmengo
Obwakabaka bulangiridde enteekateeka entongole engeri omukolo gw’ Amazaalibwa ga Kabaka ag’emyaka 68 bwegigenda okutambulamu olunaku olw’enkya naddala ku bantu abo 250 abaayitiddwa.
Ssentebe w’enteekateeka zino, Owek. Daudi Mpanga ategeezezza nti omukolo gubaliddwa essaawa emu nekitundu yokka era wetutuukidde mu Lubiri e Mengo wamma ggwe nga buli kimu kitambulira ddala bulungi.
Owek. Mpanga asabye abagenyi abayite okutuuka mu budde basobole okuyita mu mitendera gy’ebyokwerinda era babugirize Nnyinimu agenda okutuuka ku ssaawa 6 ez’okumakya.
Ono annyonnyodde nti omukolo guno, Ssaabasajja Kabaka waakusanyusibwa ‘Band’ ne kkwaaya ezenjawulo wamu ne Abeeka bandi abajja okukuba obuyimba okuva myaka egy’enjawulo era omukolo gwakutwala essaawa emu nekitundu omutanda mwanagabulira nabantu be kkeeie yamazaalibwa awamun’ekijjulo.
Olwa leero abayizi okuva mu matendero agawaggulu basiibye mu Lubiri nga baluyooyoota okusobola okutuukana n’ekitiibwa ky’ Empologoma.
Omukolo guno gwakuwerezebwa buteerevu mayengo ga BBS Terefayina abantu ba Beene abatasobodde kutuuka mu Lubiri basobole okugoberera omukolo guno.
Wetukoledde eggulire lino ng’ebirabo bya Beene byamaze dda okutuuka mu Lubiri e Mmengo nga bino bwanasiima gegagenda okufuuka Amakula.
Kinajjukirwa nti Omutanda amazaalibwa ge gano yagawaayo gakuzibwe wansi w’omulamwa gw’okulwanyisa akawuka ka Mukenenya nga abaami be babakulembeddemu olutabaalo luno okusobola okutaasa abaana ab’obuwala.
Amazaalibwa gano ga myaka 68 Ssaabasajja Kabaka Ronald Fredrick Kimera Walugembe Luwangula Muwenda Mutebi kyokka ngentikko ye mikolo ya Sunday nga 16 Kafuumulampawu 2023 abantu okwetaba mu misinde wansi womulwamwa gowkulwanyisa mukenenya 2030 wegunaatuukira.