Bya Ssemakula John
Kampala
Obwakabaka bwa Buganda bwakutandika okusomesa abasomesa bonna mu masomero gaabwo ku ngeri y’okusomesezaamu abayizi ku mutimbagano naddala mu kiseera kino ng’amasomero gali ku muggalo olwa COVID-19.
Kino kirangiriddwa Minisita w’ebyenjigiriza mu Buganda, Owek. Dr. Prosperous Nankindu Kavuma, bw’abadde akwasibwa ebyava mu bibuuzo by’abayizi ab’amasomero g’Obwakabaka eby’omwaka 2020 mu Bulange e Mmengo ku Lwokutaano.
“Tukubirize abasomesa baffe okusomeseza abaana ku mutimbagano, Ffe ng’Obwakabaka weetuli okubayambako, okubawa emisomo n’okubabangula era mu bbanga ttono tugenda kuteekawo emisomo. Nja kwenyigiramu nze kennyini tuyigirize omusomesa bw’alina okutegeka by’agenda okusomesa eby’oku mutimbagano alabe bwebyawuka neebyo eby’oku lubaawo.” Owek. Nankindu bw’annyonnyodde.
Owek. Nankindu ategeezezza nti tebasobola kutuula butuuzi ng’Obwakabaka ng’abaana mu mawanga amalala basomera ku mutimbagano era ebyenjigiriza byabwe bikyatambula bulungi.
Minisita Nankindu yeebazizza abasomesa mu masomero g’Obwakabaka olwokukola obutawera okulaba ng’abaana ba Buganda basoma n’abasaba okwongeramu amaanyi wadde wakyaliwo okusoomoozebwa.
Ono agasseeko nti abaana abafuna bbasale, babeera bava mu maka maavu nga tebalina bikozesebwa, naye abasiimye olw’okukola ennyo ne basobola okubayisa obulungi.
Okusinziira ku mukulu w’essomero erya Lubiri High school e Mmengo, Immaculate Nampijja, ategeezezza nti ku kusoomoozebwa okwaliwo awamu n’akabanga akatono abayizi ke baamala ku ssomero, baakoze bulungi bw’ogeraageranya n’omwaka gwa 2019.
Nampijja agamba nti abaana baagayaala nnyo mu kiseera ky’okuggalo era baasanga ebizibu bingi ekimu ku bintu ebyabaviirako obutayita bulungi.
Ebyanjuddwa byava my masomero okuli; Lubiri Nnaabagereka primary school, Lubiri High e Mmengo, Lubiri High e Buloba awamu ne Bbowa Vocational SSS.