Bya Huzairu Jjuuko Wasajja
Mmengo – Kyaddondo
Abaami ba Kabaka bakubiriziddwa okwaniriza abantu ba Kabaka bonna mu bitundu byabwe gye bawangaalira.
Obubaka buno Minisita wa Kabaka owa Kabineeti, Olukiiko Abagenyi n’Ensonga ez’enjawulo mu woofiisi ya Katikkiro Owek. Noah Kiyimba abuweeredde mu Bulange e Mmengo bw’abadde atikkula oluwalo lwa nsimbi ezisobye mu bukadde (37) okuva ggombolola ez’enjawulo mu masaza; Salongo, Buddu, Bulemeezi, Butambala ne Kyaggwe.
“Mu nteekateeka z’Obwakabaka zonna okuli n’eno ey’oluwalo tetusosola mu bantu ba Kabaka, oyo yenna ategeera Kabaka nti ye Kitaffe tumwaniriza, era abaami ba Kabaka tubakubiriza tebatekeddwa kusosola bantu ba Kabaka kubanga buli muntu ali mu Uganda muntu wa Kabaka n’olwekyo tuteekeddwa okutambulira awamu” Minisita Kiyimba”.
Minisita ayongedde okujjukiza abantu ku nteekateeka y’obwakabaka ey’okusitula omutindo, era n’ategeeza nti enteekateeka eno erimu okuteeka amaanyi mu kulima emmwanyi nga wano w’asinzidde n’asaba abantu akunyiikira okwettanira ekirime eky’emmwanyi.
“Ffenna tukimanyi bulungi nti Obwakabaka bwakanjula enteekateeka ya Situla Omutindo, naye nyongera akubategeeza nti entekateka eno erimu okuteeka amaanyi mu kulima emmwanyi n’olwekyo tubakubiriza okwongera amaanyi mu kulima emmwanyi nga Kamalabyonna bw’atukubiriza entakera” Minisita Kiyimba.
Mu mbeera y’emu Minisita alaajanidde abantu okunyiikira okwegobako nnawookeera w’obwavu nga beyambisa ekirime ekyemmwanyi era wano wakangulidde ku ddoboozi ku bavubuka ba ngalobunani wamu n’abo abatunda ettaka, abasabye nti mu kifo ky’okwetundako ettaka, balyeyambise nga balikolerako ebisaanidde nga okulimirako emmwanyi.
Minisita ajukizza abazadde nti abaana batuuse okudda ku masomero era abakubirizza okunyiikira okuzza abaana ku masomero, asabye abaami ba Kabaka abatongole n’abemiruka okutuukirira abazadde abo abalekerera abaana baabwe, babakomeko kiyambeko okulaba nga buli mwana afuna omukisa okusomesebwa.
Omwami w’essaza ly’e Ssingo, Mukwenda Kagimu Deo akubirizza abantu okunyiikira okukozesa ebyo ebibalinanye kibayambeko okwekulaakulanya n’okweggya mu bwavu.
Ye Omubaka akiikirira abantu b’e Bukoto mu lukiiko olukulu olw’eggwanga Hon. Emmanuel Kiyimba ayozaayozezza Katikkiro olw’okuweza emyaka 13 nga akutte ddamula nga wano ajjukizza abantu ensonga za Buganda ssemasonga ettano era n’awera nkolokooto okuzirwanirira mu kisanja kye kino ekisoose mu paalamenti.
Eggombolola Musaale Wakyato ery’essaza Bulemeezi lye lisinze amalala mu kuwaayo oluwalo leero, bawaddeyo obukadde munaana n’emitwalo ena mu enkumi ttaano mu bitaano (8,045,500shs).