Musasi waffe
Ekitongole kya Ssaabasajja Kabaka ekikola ku ttaka ekya Buganda Land Board [BLB] kifunye Ssenkulu omuggya.
Simon Kaboggoza alondeddwa okudda mu bigere bya Oweek. David Kyewalabye Male ng’ono mu Mukutulansanja wa 2019 yalondebwa nga minisita avunanyizibwa ku bulambuzi, embiri, amasiro n’obuwangwa.
Kyewalabye yalekebwa ku kifo ekyo okumala omwaka, kiyambeko okuteekateeka enzirukanya y’ekitongole nga bwenabeera n’okwekkenenya ani asaanidde okumuddira mu bigere.
Ng’ayajula Kaboggoza Katikkiro Charles Peter Mayiga, amusabye okukola obutaweera okwongera okutumbula omutindo gwa BLB.
“Olukiiko olufuga BLB lwasemba Omuk. Simon Kaboggoza okubeera Ssenkulu omuggya. Ebimukwatako nabituusa embuga era Ssaabasajja Kabaka n’asemba omulimu ogwo agutwale,” Mayiga bwagambye.
“Nebaza Oweek. David Kyewalabye Male olw’obuweereza bwakoze mu kitongole kyaffe ekyo eky’ettaka emyaka kumpi 12,” Mayiga bwagambye.
Kyewalabye male yaliko Ssenkulu wa Bucadef wamu n’omuwanika w’Enkuluze.
Ekitongole kya BLB kyatondebwawo mu 1993 nga kiyitibwa Ebyaffe Board nga kikulirwa John Kawanga eyali omubaka wa palamenti akiikirira ekibuga ky’e Masaka.
Ono yaddirirwa James Mulwana oluvanyuma Oweek. Martin Kasekende. Mu 1994 erinnya lyakyusibwa ne kiyitibwa Buganda Land Board era kibadde ne bassenkulu, Michael Ssozi, Omuk. Levi Zzimbe wamu n’Oweek David Kyewalabye Male.
BLB erabirira ettaka ly’Obwakabaka erya Nkuluze olusi eriyitibwa Olusuku lwa Ssaabasajja Kabaka mayilo 350 ezivaamu ebiwanirira emirimu gya Kabaka n’embiri.
BLB era erabirira ettaka lya Buganda ettongole ng’eririko Bulange ne Masengere oba ettaka okutudde embuga z’amasaza n’amaggombolola.
Eddala mulimu ettaka ly’ebayitanga ery’abaami, ettaka lya Katikkiro, ettaka ly’omulamuzi, ettaka lya Namasole, ettaka ly’omuwanika, ettaka lya Nnalinnya Lubuga n’eddala.