Bya Francis Ndugwa
Bulange – Mmengo
Obwakabaka bwa Buganda bukwataganye nekitongole ekirondoola eby’eddagala mu ggwanga ki National Drug Authority (NDA) okutumbula eby’obulamu nga bakozesa eddagala ery’ekinnansi (Herbal).
Omukolo gw’okuteeka emikono ku ndagaano eno guyindidde mu Bulange e Mmengo ku Lwokubiri nga Minisita w’ebyobulamu mu Bwakabaka, Owek. Cotilida Nakate Kikomeko yataddeko omukono kulwa Buganda ate Ssaabawandiisi w’ekitongole Dr. David Nahamya nateekako kulwa NDA.
Bw’abadde ajulira omukwano guno, Katikkiro Charles Peter Mayiga agambye nti mukulu nnyo kuba buli omu amanyi obukulu bw’ensonga y’ebyobulamu kuba esimba butereevu mu ddagala nenkozesa yalyo.
Owek. Mayiga agambye nti waliwo ekizibu mu Uganda kuba abantu bangi baagala okwejjanjaba nga tebatuuse mu bakugu kuba abasinga bakoma mu budduuka obutunda eddagala nawera okukwatagana n’ekitongole kino okukomya omuze guno.
Okusinziira ku Katikkiro Mayiga, omukago guno gujja kuyamba okutumbula eddagala ery’obutonde kuba liwonya nga lyetaaga kulung’amya n’okuggyaawo obwebindu abasawo ab’ekinnaansi bwebateekawo awamu n’okuliteekako amaanyi g’empewo.
Owek. Mayiga era asabye bano okukwatagana ne Buganda mu nteekateeka z’okuzzaawo ebibira n’okukuuma obutonde bwensi n’okufuna eddagala eriyamba okujjanjaba endwadde ez’enjawulo.
Ye Minisita w’Eby’obulamu mu Bwakabaka, Owek. Cotilda Nakate Kikomeko ategeezezza nti basuubira omukago guno okuyamba okutumbula okukola n’okukozesa eddagala ly’obutonde mu ngeri etuukiridde.
Owek. Nakate annyonnyodde nti bakukwatagana ne minisitule ez’enjawulo mu Bwabakabaka okuggyayo obulungi ebiruubirirwa by’omukago guno okusobola okuteeka ensonga eno ku mutindo.
Akulira Bboodi y’ekitongole ki National Drug Authority, Dr. Bitekyerezo Medard agambye nti babadde bakolagana n’Obwakabaka ku mitendera egy’enjawulo naddala ku ngeri eddagala linaasangwa gyerisobola okukozesebwamu naye kati basazeewo enkolagana eno ebeere mu butongole.
Dr. Bitekyerezo agasseeko nti baagala okulaba ng’omutindo gw’eddagala ly’obutonde gutumbulwa era bangi ku bannayuganda eddagala lino baatandika okulikola nga balitunda n’ebweru w’eggwanga.
Omukolo guno gwetabiddwako baminisita ab’enjawulo n’abakungu b’ebitongole mu Bwabakabaka awamu n’abakugu okuva mu kitongole ki NDA.