Bya Francis Ndugwa
Kampala – Kyaddondo
Obwakabaka bwa Buganda bukungubagidde abadde Pulezidenti wa UAE, Sheikh Khalifa bin Zayed Al Nahyan eyaziikiddwa gyebuvuddeko.
Obubaka obukubagiza bwetikidddwa Katikkiro Charles Peter Mayiga ku Lw’okutaano bw’abadde agenyiwaddeko ku kitebe kya UAE mu ggwanga ekisangibwa e Kampala okubasaasira nga ayaniriziddwa Ambasada H.E Abdullah Hassan Obaid Hassan Alshamsi.
“Ku lw’Obwakabaka bwa Buganda ntuusa okusaasaaira eri abantu ba Abu Dhabi ne UAE olw’okufiirwa omukulembeze wabwe Sheikh Khalifa bin Zayed Al Nahyan, enkulaakulana etuuseewo mu UAE etulaga nti Sheikh Khalifah abadde alumirirwa nnyo abantu be, ” Owek. Mayiga bw’ategeezezza.
Katikkiro Mayiga agambye nti enkola ya Sheikh Khalifa ewa abakulembeze eky’okuyiga bwebaba baagala okuteekawo enkulaakulana n’okukyuusa obulamu bw’abantu be bakulembera.
Owek. Mayiga annyonnyodde nti Buganda erina enkolagana ensaamusaamu n’ekitongole kya Red Crescent ekiri mu Abu Dhabi nga mu nteekateeka eno bazimbiddemu amalwaliro abiri okuli erye Nsangi ne Kalasa mu Bulemeezi nakakasa nti bakwongera okuginyweza nga bayambibwako Ambasada basobole okusakira abantu ba Kabaka eby’enkulaakulana.
Okusinziira ku Katikkiro Mayiga, bw’otunuulira enkulaakulana eri mu UAE kikuwa essuubi nti enkolagana yaayo ne Buganda saako ne Uganda ejja kuganyula abantu ba Nnyinimu Ssaabasajja Kabaka.
Ono asiimye Ambasada olw’okubakyaza era n’asaba atuuse obubaka bw’abantu ba Kabaka eri abantu beeyo kuba omukulembeze eyabavudde ku maaso abadde kyakulabirako olw’engeri gyabadde ayambamu abantu.