Bya Ssemakula John
Kampala
Pulezidenti w’ekibiina kya National Unity Platform (NUP), Robert Kyagulanyi aka Bobi Wine, ategeezezza nti obuvunaanyizibwa bwa bannayuganda abawangaalira ebweru bulina okuggumizibwa n’okwongerwamu amaanyi.
Kyagulanyi yagambye nti gwe mulundi ogusookedde ddala, okulaba nga bannayuganda ebweru bonna beenyigidde butereevu mu nsonga z’okununula eggwanga lyabwe.
Bino Kyagulanyi yabyogeredde mu lukung’aana lwa bannayuganda abawangaalira ebweru ku wiikendi ewedde.
Kyagulanyi yasiimye bannayuganda olw’omulimu amatendo gwe bakoze era n’abeebaza olw’okubafunira emikago awamu n’okwongera amaanyi mu lutalo luno nga bawaayo ku ebyo bye balina era n’abasaba okugutwala mu maaso.
Okusinziira ku Kyagulanyi, Pulezidenti Museveni atya nnyo bannayuganda abali ebweru kuba naye baamuyamba nnyo mu lutalo olwamuleeta mu buyinza.
“Mu myaka gya 1980 nga Museveni alwana, yeesigama nnyo ku kiwayi kya bannayuganda abaali ebweru aba National Resistance Army, (NRA) okuwangula Obote awamu n’okumukyayisa ensi.” Bobi Wine bw’agambye.
Ono yannyonnyodde nti gavumenti ebataddeko abantu mu bitundu ebyenjawulo okugezaako okubaggya ku mulamwa wamu n’okubamalamu amaanyi naye n’abasaba babeere banywevu.
“Eyo y’ensonga lwaki gavumenti ebataddemu bambega okubatambulizaako amaaso. Nsaba buli omu abeere bulindaala era yeekengere wakati nga tugezaako okutwala olutabaalo luno mu maaso.” Kyagulanyi bwe yalambuludde.
Ono bannayuganda abawangaalira ebweru abasabye okukimanya nti okulwanyisa gavumenti si kintu kya lunaku lumu, oba misinde gya mubunabyalo. Noolwekyo balina okwetegeka okutwala olutalo luno mu maaso.
Bobi Wine agamba nti okuwanika kibeera kitegeeza kwewaayo mu mikono gya Pulezidenti Museveni ne banne, abaliisa bannayuganda akakanja.