Bya Ssemakula John
Kampala
Akulira ekisinde ki People’s Front for Transition (PFT), Dr Kizza Besigye agamba nti abayivu abaliwo kati tebasikiriza bayizi kuteekamu maanyi basobole okufuna ebiseera by’omu maaso ebitangaavu.
“Abayivu abalina ddiguli obasanga basimbye nyiriri nga bagenda kukola bwakadaama ate abalala bafukamira okulaba nga babaako byebabawa. Singa tetulwana nnyo netukyuusa ebyenjigiriza n’ebyenfuna tugenda kusaanawo,” Besigye bw’ategeezezza mukukubaganya ebirowoozo okubadde ku mutimbagano.
Besigye awadde eky’okulabirako kyakulira ekibiina ky’ abasawo ki Uganda Medical Association (UMA) Dr Samuel Oledo alina ddiguli 2 kyonna naakulemberamu banne nebafukamira mu maaso ga Pulezidenti Museveni nga bamusaba akkirize yeesimbewo mu kalulu ka 2026.
Dr. Besigye agamba nti ebikolwa nga bino tebisobola kwegombesa baana kusoma nnyo kuba abasoma bali ku mazizi beegayirira abalina obuyinza babayambe okubongeza omusaala.
Ono ategeezezza nti ekirina okukolebwa kwekulaba nti bannayuganda beerwanako nebakomyawo obuyinza bwabwe obwawambibwa gavumenti ya Museveni kuba kati gavumenti eno efaayo ku bantu abatono olwo netulugunya abasigadde nga bwegwali mu myaka gya 1970 bne 1980.
Besigye annyonnyodde nti wadde bannayuganda balwana olutalo okwenunula ku gavumenti ezali zibalwanyisa naye ate abakwata obuyinza babalyamu olukwe.
Enfunda ziwera nga Dr. Besigye agezaako okulaga gavumenti enteekateeka ez’enjawulo ebintu bwebirina okutambuzibwa awamu n’okusaba wabeewo okukyuusa obuyinza.
Mu 2012, Dr Besigye yategeka okwekalakaasa nga atambuza ebigere nga awakanya ebbeeyi y’ebintu okulinnya . Ono era yagezaako okulemesa gavumenti okukyuusa Ssemateeka mu ‘Togikwatako’ era bweyalemererwa natandika ‘Tubalemese.’