Bya Ssemakula John
Kampala
Ssaabasajja Kabaka Ronald Muwenda Mutebi II akungubagidde musajja we Patrick Bakka Male era n’asiima emirimu gy’akoledde eggwanga naddala mu kiseera we yabeerera omusomesa awamu n’omukulu w’essomero lya Kings College Budo.
Bino Omutanda abiyisizza mu bubaka bwe obw’okusaasira bw’atisse omukubiriza w’olukiiko lwa Buganda, Owek. Patrick Luwaga Mugumbule mu kusabira omwoyo gw’omugenzi mu Lutikko e Namirembe ku Lwokuna.
Kabaka Bakka Male amusiimye olw’ettoffaali lye yagatta ku Mulangira Chrispine Jjunju Kiweewa bwe yali asomera Budo awamu n’okubangula abaana b’eggwanga.
Omutanda agambye nti, “Omugenzi tumumanyidde ekiseera kinene ddala era akoze kinene okutumbula ebyenjigiriza mu ggwanga lino.”
Obwedda buli ayogera ku mugenzi ng’amwogerako ng’abadde omusomesa ate omuzadde, ow’amazima era omuntu mulamu.
Ye amyuka Pulezidenti w’eggwanga, Jessica Rose Alupo ayogedde ku mugenzi ng’omuntu eyamuyamba ennyo mu budde bwe yali Minisita w’ebyenjigiriza era omusomesa ow’enjawulo eyamuyamba okugonjoola ebizibu by’abasomesa naddala abo abaali beekalakaasa mu biseera ebyo.
Ate Ssaabalabirizi w’ekkanisa ya Uganda, Dr. Samuel Stephen Kaziimba Mugalu, asabye abantu okukolera mu biro byabwe bwe baba baweerereza kyokka nga bakola kino, bakole obuteebalira.
Nnamwandu w’omugenzi Molly Nakibuule Bakka Male wamu n’abaana, beebazizza abantu bonna naddala ekkanisa olwokuba empagi luwaga mu bulamu bwabwe.
Omukolo guno gwetabiddwako abantu ab’enjawulo okuva mu gavumenti eyaawakati, abeebitiibwa okuva e Mmengo okuli; minisita w’ebyemizannyo n’okwewummuzaamu, Owek. Henry Ssekabembe Kiberu, bannabyabufuzi, bannaddiini, abayizi okuva e Budo n’amatendekero awamu n’abasomerako e Budo ne Mmengo.
Patrick Bakka Male yafiiridde ku myaka 60 nga y’abadde omukulu w’essomero lya King’s college Budo ow’e 13 era nga y’asinze okulwa mu kifo kino so nga naye yali muyizi mu ssomero lino. Ono agenda kuziikibwa enkya ku Lwokutaano e Luwunga Kayabwe ku luguudo oludda e Masaka.