Bya Gladys Nanyombi
Mmengo
Obwakabaka bufunye emiti egiwerera ddala 1500 okuva mu bannamikago ab’enjawulo gisimbibwe era giyambeko mukuzzaawo obutondebwensi okutaguddwa ennyo.
Ebibiina by’obwannakyewa ebyenyigidde mu nteekateeka eno kuliko; Naturing Uganda, World Wide Fund for Nature, Save the Planet awamu n’ebirala era nga bano bategeezezza nga bwe bagenda okukwasizaako Obwakabaka okulaba ng’obutonde buddawo.
Bw’abadde akwasibwa emiti gino mu Lubiri e Mmengo, Minisita w’obutonde bw’ensi mu Buganda, Mariam Mayanja agambye nti, egimu ku miti gino bagenda kugisimba mu mbiri za Kabaka ez’enjawulo.
“Baagala Olubiri luno lubeere nga lwe lutulaga ekyokulabirako mu kukuuma obutonde bw’ensi nooolwekyo tubeebaza.” Owek. Mayanja bw’agambye.
Minisita Mayanja ategezeezza nti buli muntu aneetaba ku mukolo guno agenda kuweebwa omuti gwanaasimba mu maka ge.
Bannamikago bawaddeyo emiti egy’enjawulo omuli; gikattansiri, ebimuli ebigenda okwongera okunyiriza Olubiri n’emiti gy’ebibala ebyenjawulo ng’emicungwa, emiyembe n’ebitafeeri.
Omukungu wa Kabaka alabirira Olubiri lwe Mmengo, Ssewava Robert asiimye bannamikago era n’ategeeza nti emiti gino bagenda kugisimba mu mitendera egy’enjawulo.
Ye Ssegayi Wilber, okuva mu kitongole kya Naturing Uganda ategeezeza nti basazeewo okukolagana n’Obwakabaka bwa Buganda olw’amaanyi ge butaddemu okutaasa obutonde.
Akwataganya emikago mu kitongole kya World Wide Fund for Nature, Ritah Kyategeka annyonnyodde nti baagala okulaba ng’emiti egisaanyiziddwawo gizzibwawo.