Bya Ssemakula John
Kampala
Bannayuganda basabiddwa okwettanira enteekateeka zonna ezigendereddwamu okukung’aanya omusaayi kisobozese okutaasa obulamu bwabo abagwetaaga.
Okusaba kuno kukoleddwa Ssenkulu wa Kabaka Foundation Omuk. Eddie Kaggwa Ndaggala e Ssentema Busiro bw’abadde n’ab’ekitongole kya Redcross ne Uganda Blood Transfusion Services mu kubangula abaami ba Kabaka ku nteekateeka y’okugaba omusaayi mu ssaza lino.
Omuk. Ndaggala agamba nti nga omukulembeze Kabaka gweyakwasa obuvunanyizibwa ku kujjanjaba n’okulondoola obulamu bw’ abantube afunye okutya nti singa bannayuganda naddala mu Buganda tebavaayo kuwaayo musaayi omuwendo gw’abantu abafa olw’omusaayi gwandyeyonera bwatyo nabasaba okujJumbira enteekateeka y’okuwaayo omusaayi.
Omuk. Ndagala annyonnyodde nti omuwendo gw’abantu abagaba omusaayi bakenderedde ddala ekyongedde omuwendo gw’abantu abafa olw’ebbula ly’omusaayi.
Ono asinzidde wano nayanjulira abantu b’Omutanda enteekateeka ya Beene egendereddwamu okutumbula eby’obulamu nga muno mulimu okuzimbira abantu b’omumugotteko amalwaliro n’amasomero kiyambe okutumbula embeera zaabwe.
Omukungu okuva mu Redcross, Esther Namayanja alambuliridde abaami ba Kabaka ebisaanyizo by’omuntu alina omugaba omusaayi era nebyo byalina okugoberera.
Omumyuka wa Ssebwana Vincent Kayongo yeeyamye okukunga abantu ba Kabaka mu kitundu kino bajjumbire enteekateeka eno basobole okutaasa obulamu.
Ate omukungu w’ekitongole kya Uganda Blood Transfusion Services Sam Wante yeebazizza Obwakabaka olw’okufaayo ennyo okutumbula eby’obulamu nga bayita mu nteekateeka ez’enjawulo.
Enteekateeka yo’kukunganya omusaayi egenda kubuna amasaza gonna agakola Obwakabaka bwa Buganda nga yakutandikira mu ssaza Buddu nga ennaku z’omweezi 6 omwezi ogujja omwaka guno nga eno egenda kumalirayo ddala sabiiti namba.