Bya Betty Namawanda
Kyotera – Buddu
ABANTU ab’enjawulo okuli; abakulembeze, abeng’anda, n’abatuuze, beeyiye ku kyalo Simba Katovu mu ggombolola y’e Kakuuto mu Disitulikiti y’e Kyotera okungubagira abadde omubaka mu Palamenti ya a East Africa, Mathias Kasamba era eyaliko omubaka w’essaza ly’e Kakuuto. Kino kiddiridde amawulire g’okufa kwa Kasamba okusaasaanira ekitundu kino mu kawungeezi k’Olwokubiri.
Abadduukirize ab’enjawulo batuuse mangu mu maka ga Kasamba era obwedda buli omu amwogerako birungi byerere.
Mwannyina wa Kasamba, Rose Nassiwa ategeezezza nti baagambiddwa nti ekirwadde kya COVID-19 kyalumba muganda waabwe era kino kye kyamuviiriddeko okufa era ono yabadde empagi luwaga mu famire.
Omumyuka wa Ppookino asooka, Oweekitibwa Nalubowa Rose ayogedde ku mugenzi ng’omuntu abadde ayagala ennyo Kabaka we era akumakuma abantu ba Kabaka mu kitundu kino.
Mu ngeri yeemu ssentebe wa disitulikiti y’e Kyotera, Patrick Kintu Kisekulo, alambuludde ku nteekateeka z’okuziika nga bwe zitambula nga Kasamba waakuziikibwa ku Ssande eno era ne yeetonda ku mawulire agaasoose okufulumizibwa nti omugenzi waakuziikibwa ku Lwokutaano.
Kisekulo agamba nti Kasamba akoze nnyo okumalawo entalo mu bannabyabufuzi mu kitundu kino.
Ate ye omubaka w’essaza lye Kakuuto, Christopher Kalemba, omugenzi amwogeddeko ng’abadde omukulembeze era omusajja agatta abantu mu kitundu kino.
Abatuuze ab’enjawulo boogedde ku mugenzi ng’abadde omusajja atali mulwanyi wa ntalo, omukkakkamu era abadde ayagaliza buli muntu era baakumusubwa.
Ssentebe w’olukiiko oluteesiteesi, Fred Ssekyewa, alaze enteekateeka bwe zigenda okutambula. Omubaka Kasamba yafiiridde mu ddwaliro e Nakasero era wategekeddwawo okusaba ku kiggo kya St. John Baptist Ssanje oluvannyuma aziikibwe ku Ssande e Kakuuto.