Bya Ssemakula John
Buddu – Nkoni
Abantu ba Ssaabasajja Kabaka okuva e Buddu n’ebitundu ebirilaanyewo baleese ebirabo bya Nnyinimu Ssaabasajja Kabaka ku kitebe ky’essaza e Buddu okwetegekera emikolo gy’amatikkira aga 28.
Bano abaleese ebirabo kuliko abeegattira mu kibiina kya CPS- Pewosa okuva mu masaza ag’enjawulo nga Buddu, Ssese, Mawogola, Kabula ne Kooki.
Mu birabo byebaleese mulimu ensimbi obukadde 4 n’ekitundu ez’okugula ente, embugo enkalu 60 n’ebintu ebirala.
Eyakulembeddemu bano era akwanaganya ebibiina bino eby’obweggasi, Kasujja Baakokyoyiga agamba nti buli omu yasonze nnusu 1000 nebasobola okuweza ensimbi zino.
Bano beebebazizza Nnyinimu Ssaabasajja Kabaka olw’okubalagira okwegatta n’okukola obutaweera era y’ensonga lwaki omuggalo tegubakosezza nnyo nga bwekiri mu bitundu ebirala.
Bwabadde akwasibwa ebirabo bino, Ppookino Jude Muleke Mulembya abeebazizza olw’okuleeta embugo ekintu ekigyirayo ddala ekifananyi kya Buddu n’ omulamwa gw’amatikkira gano oguvuga nti “Obuwangwa n’enono y’entabiro ye’nkulakulana.
Mu balala abatonnye ebirabo kuliko; abasawo okuva ku ddwaliro ly’e Kitovu nga bakulembeddwamu Sr. Pouline Namirembe eyasiimye Beene olw’okulwanyisa ekirwadde kya Fistula (Ekikulukuto) mu bakyala mu Buddu.
Era mu ngeri yeemu Omusumba w’esazza ly’e Masaka Bishop Severus Jjumba ayozaayozezza Ssaabasajja Kabaka okutuuka ku matikkira ge aga 28 era n’amwebaza okubeera omusaale mu by’obulamu.