Bya Ssemakula John
Mawokota – Kyaddondo
Akakiiko mu lukiiko lwa Buganda akavunaanyizibwa ku ttaka, ebyobulimi, obulunzi n’obwegassi, kasiimye emirimu egikolebwa minisitule etambuza emirimu egyo mu Bwakabaka bwa Buganda mu ssaza lya Kyaddondo awamu ne Mawokota.
Kiddiridde ekiragiro kya Ssaabasajja kye yawa ng’aggulawo Olukiiko lwa 29 olutuula olusooka, okulondoola emirimu gy’Obwakabaka n’okumanyisa abantu biki ebikolebwa.
Ssentebe w’akakiiko kano, Owek. Francis Xavier Ssentamu agamba nti kino kyakubayamba okugaziya ku nteesa yaabwe mu Lukiiko ku ngeri y’okuzza Buganda ku ntikko nga boogera n’obumanyi oluvannyuma lw’okwerabirako.
Emirimu bano bagitandise na kulambula kitongole kya CBS- PEWOSA ku luguudo Kabaka Anjagala, Olubiri lwa Ssaabasajja e Mmengo emiti egisimbiddwa okutereeza obutonde bw’ensi wamu ne Estate ya Mirembe Villas egendereddwamu okukulaakulanya n’okwongera ku nnyingiza ya Buganda nga byonna biri mu ssaza Kyaddondo.
Bwe batuuse e Mawokota, akakiiko kalambudde atwala abalimisa mu ssaza lino, Yiga Charles Ponsiano Nabutono gwe basanze ku kyalo Buseese mu ggombolola y’e Nkozi era ono abalambuza emmerezo y’essaza ey’emmwanyi era nayita ne mu kusoomooza kw’asinze okusanga.
Ssentebe w’akakiiko kano, Ssentamu yeebazizza Minisitule etwala ensonga zino olw’omulimu omulungi ogukolebwa wakati kulaba ng’Obwakabaka bukulaakulana mu ngeri zonna naddala ebyobulimi.
Minisita w’Ettaka Obulimi, Obulunzi Obusuubuzi n’Obwegassi mu Bwakabaka, Owek. Mariam Mayanja Nkalubo agamba nti wakati mu kusoomoozebwa kw’amazzi agasumbuwa, Obwakabaka bwayingira omukago ne gavumenti eyaawakati okufunayo ttanka z’amazzi okufukirira ennimro ku buli ssaza.
Ate Owek. Hajji Amis Kakomo alambuludde ku kigendererwa ky’okulambula kuno n’agamba nti kwe kulaba ng’emirimu n’ebyogerwa ku mpapula bwe gikolebwa ng’akakiiko kamaze okubiyisa.
Abamu ku bakiise okuli n’omukiise wa Ssaabasajja Kabaka ow’e Mbale, Owek. Rashid Nsubuga agamba nti kibawadde okusoomoozebwa mu kitundu ky’alamulirako Omutanda.
Enteekateeka eno yaakugenda mu maaso era ng’obukiiko obwenjawulo bwakulondoolanga emirimu gy’Obwakabaka wakati mu kuzza Buganda ku ntikko.